Եզեկիել 39։1-29
39 «Մարդո՛ւ որդի, մարգարեացիր Գոգի+ մասին ու ասա. «Ահա թե ինչ է ասում Գերիշխան Տեր Եհովան. «Ես քո դեմ եմ, ո՛վ Գոգ՝ Մեսեքի ու Թոբելի+ գլխավոր առաջնորդ:*
2 Ես այնպես կանեմ, որ դու ուրիշ ճանապարհ բռնես, կհանեմ քեզ հյուսիսի ամենահեռավոր վայրերից+ ու կբերեմ Իսրայելի լեռների վրա:
3 Ձախ ձեռքիցդ ցած կգցեմ քո աղեղը և աջ ձեռքիցդ՝ քո նետերը:
4 Իսրայելի լեռների վրա դու կընկնես,+ քո բոլոր զորքերը և այն ժողովուրդները, որոնք քեզ հետ կլինեն, նույնպես կընկնեն: Քեզ որպես կերակուր կտամ բոլոր տեսակի գիշատիչ թռչուններին և գազաններին»:+
5 Դու բաց դաշտում կընկնես,+ քանի որ ես եմ դա ասել,– ասում է Գերիշխան Տեր Եհովան:–
6 Ես կրակ կուղարկեմ Մագոգի ու կղզիներում ապահով բնակվողների վրա:+ Եվ մարդիկ կիմանան, որ ես Եհովան եմ:
7 Ժողովրդիս՝ Իսրայելի մեջ իմ սուրբ անունը հայտնի կդարձնեմ ու այլևս թույլ չեմ տա, որ սուրբ անունս պղծվի: Եվ ազգերը կիմանան, որ ես Եհովան եմ՝+ Սուրբը Իսրայելում:+
8 Այո՛, այդ օրը գալիս է, ինչ ասվել է, կատարվելու է,– ասում է Գերիշխան Տեր Եհովան:– Դա այն օրն է, որի մասին ասում էի:
9 Իսրայելի քաղաքների բնակիչները դուրս կգան, կհավաքեն զենքերը՝ փոքր ու մեծ վահանները, աղեղները, նետերը, մահակներն* ու նիզակները, ու կրակ կվառեն: Նրանք յոթ տարի դրանցով կրակ կվառեն:+
10 Կարիք չեն ունենա ցախ հավաքելու դաշտից, ոչ էլ վառելափայտ՝ անտառներից, քանի որ զենքերն են օգտագործելու որպես վառելանյութ:
Նրանք կթալանեն նրանց, ովքեր իրենց են թալանել, և ավար կվերցնեն նրանցից, ովքեր իրենցից են ավար վերցրել,– ասում է Գերիշխան Տեր Եհովան:–
11 Այդ օրը ես Գոգին+ թաղվելու տեղ կտամ Իսրայելում՝ ծովից դեպի արևելք գտնվող հովտում, որով անցնում են ճամփորդները, և այն կփակի անցորդների ճանապարհը: Այնտեղ կթաղեն Գոգին ու նրա ողջ զորքերին, և այդ տեղը կկոչվի Համոն-Գոգի*+ հովիտ:
12 Իսրայելի ժողովուրդը յոթ ամիս կթաղի նրանց, որպեսզի մաքրի երկիրը:+
13 Այդ երկրի ողջ ժողովուրդը կթաղի նրանց, և դա իրենց պատիվ կբերի այն օրը, երբ ես փառավորեմ ինձ,+– ասում է Գերիշխան Տեր Եհովան:–
14 Մարդիկ կնշանակվեն, որոնք մշտապես կշրջեն երկրով և կթաղեն երկրի վրա մնացած դիակները, որպեսզի մաքրեն այն: Նրանք յոթ ամիս կփնտրեն դրանք:
15 Երբ երկրով շրջողները մարդու ոսկոր տեսնեն, կողքին նշան կդնեն: Ապա նրանք, ովքեր նշանակված կլինեն թաղելու, կթաղեն այն Համոն-Գոգի հովտում:+
16 Այնտեղ նաև Համոնա* անունով քաղաք կլինի: Նրանք կմաքրեն երկիրը»:+
17 Ո՛վ մարդու որդի, Գերիշխան Տեր Եհովան ասում է. «Ամեն տեսակ թռչուններին և բոլոր գազաններին ասա. «Հավաքվե՛ք ու եկե՛ք: Հավաքվե՛ք իմ զոհի՝ մեծ զոհի շուրջբոլորը, որը ես պատրաստում եմ ձեզ համար Իսրայելի լեռների վրա:+ Դուք միս կուտեք և արյուն կխմեք:+
18 Զորավորների միսը կուտեք ու երկրի առաջնորդների արյունը կխմեք՝ խոյերի,* գառների, այծերի ու ցլերի. բոլորն էլ Բասանի պարարտ անասուններն են:
19 Դուք իմ պատրաստած զոհի ճարպից այնքան կուտեք, մինչև որ կշտանաք, և դրա արյունից այնքան կխմեք, մինչև որ հարբեք»:
20 Իմ սեղանի շուրջը դուք կկշտանաք ձիերով ու կառապաններով, զորավորներով ու ռազմիկներով»,+– ասում է Գերիշխան Տեր Եհովան:–
21 Ես ազգերին ցույց կտամ իմ փառքը, ու բոլոր ազգերը կտեսնեն իմ իրագործած դատաստանը և նրանց դեմ գործադրած իմ զորությունը:+
22 Այդ օրվանից Իսրայելը կիմանա, որ ես Եհովան եմ՝ նրա Աստվածը:
23 Ազգերը կիմանան, որ Իսրայելը գերության տարվեց իր մեղքի՝ իմ հանդեպ անհավատարիմ լինելու պատճառով:+ Դրա համար էլ երես դարձրի+ իսրայելացիներից ու թշնամիների ձեռքը մատնեցի նրանց,+ և բոլորը սրով ընկան:
24 Ես նրանց արժանի հատուցում տվեցի իրենց անմաքրության և մեղքերի համար ու երես դարձրի նրանցից:
25 Ուստի Գերիշխան Տեր Եհովան ասում է. «Ես կվերադարձնեմ Հակոբի գերիներին,+ կգթամ ողջ Իսրայելին+ և նախանձախնդրորեն կպաշտպանեմ* իմ սուրբ անունը:+
26 Իրենց անհավատարմության պատճառով նվաստացում կրելուց հետո+ նրանք ապահով կբնակվեն իրենց երկրում, ու ոչ ոք նրանց չի վախեցնի:+
27 Ժողովուրդների միջից նրանց կհավաքեմ ու կհանեմ թշնամիների երկրներից+ և այդպես նրանց միջոցով նաև կսրբացնեմ ինձ շատ ազգերի աչքի առաջ:+
28 Նրանք կիմանան, որ ես Եհովան եմ՝ նրանց Աստվածը, երբ նրանց գերության տանեմ ուրիշ ազգերի մեջ ու հետո վերադարձնեմ իրենց երկիր՝ մեկին անգամ չմոռանալով:+
29 Այլևս երես չեմ թեքի նրանցից,+ որովհետև ոգիս կթափեմ Իսրայելի վրա»,+– ասում է Գերիշխան Տեր Եհովան»:
Ծանոթագրություններ
^ Կամ՝ «իշխան»:
^ Կամ հնարավոր է՝ «սրածայր ձողերը»:
^ Կամ՝ «Գոգի ամբոխների»:
^ Նշանակում է «ամբոխներ»:
^ Այսինքն՝ արու ոչխարների:
^ Բռց.՝ «բացարձակ նվիրվածություն ցույց կտամ»:
