Եզեկիել 8։1-18
8 Վեցերորդ տարում՝ վեցերորդ ամսվա հինգերորդ օրը, երբ նստած էի իմ տանը, և Հուդայի երեցները նստած էին իմ առաջ, Գերիշխան Տեր Եհովայի ոգին* իջավ ինձ վրա:
2 Ես տեսա ինչ-որ մեկին, ով նման էր կրակի: Նրա՝ գոտկատեղի տեսք ունեցող հատվածից ներքև կրակ էր վառվում,+ իսկ դրանից վերև փայլ էր ճառագում, որը նման էր ոսկու և արծաթի համաձուլվածքի փայլի:+
3 Նա ձեռքի տեսք ունեցող մի բան մեկնեց ու բռնեց իմ մազերից: Աստծուց տրված տեսիլքում ոգին տարավ ինձ երկրի ու երկնքի մեջտեղը և բերեց Երուսաղեմ՝ ներքին գավիթ* տանող հյուսիսային մուտքի+ մոտ, որտեղ Աստծու բարկությունը բորբոքող խանդի կուռքն էր կանգնեցված:+
4 Այնտեղ Իսրայելի Աստծու փառքն էր,+ որը նման էր այն բանին, ինչ տեսել էի դաշտահովտում:+
5 Ապա նա ասաց ինձ. «Մարդո՛ւ որդի, նայիր դեպի հյուսիս»: Ես նայեցի դեպի հյուսիս և դեպի զոհասեղանը տանող հյուսիսային մուտքի մոտ տեսա խանդի կուռքը:
6 Հետո նա ավելացրեց. «Մարդո՛ւ որդի, տեսնո՞ւմ ես, թե Իսրայելի ժողովուրդը ինչ զզվելի ու գարշելի բաներ է անում,+ որոնց պատճառով ես հեռանում եմ իմ սրբարանից:+ Սակայն դու է՛լ ավելի գարշելի բաներ կտեսնես»:
7 Հետո նա բերեց ինձ գավիթի մուտքի մոտ, ու ես մի անցք տեսա պատի մեջ:
8 Եվ նա ասաց ինձ. «Մարդո՛ւ որդի, մեծացրու պատի միջի այդ անցքը»: Ես այն մեծացրի ու մի մուտք տեսա:
9 Հետո նա ասաց. «Մտիր ու տես, թե ինչ չար ու գարշելի բաներ են նրանք այնտեղ անում»:
10 Ես մտա ու բոլոր պատերի վրա տեսա ամեն տեսակ զեռունների,* զզվելի գազանների+ և Իսրայելի բոլոր գարշելի կուռքերի քանդակված պատկերները:+
11 Դրանց առաջ կանգնած էին Իսրայելի երեցներից 70-ը, և նրանց հետ՝ Սաֆանի+ որդի Հեզոնիան: Ամեն մեկի ձեռքին բուրվառ* կար, ու խնկի անուշահոտ ծուխը ամպի պես վեր էր բարձրանում:+
12 Նա ասաց ինձ. «Տեսնո՞ւմ ես, մարդո՛ւ որդի, թե Իսրայելի երեցները մթության մեջ ինչ են անում ներքին սենյակներում, որտեղ ամեն մեկն իր կուռքն ունի պատին պատկերված: Նրանք ասում են. «Եհովան չի տեսնում մեզ: Եհովան լքել է այս երկիրը»»:+
13 Ապա նա ասաց ինձ. «Բայց դու է՛լ ավելի գարշելի բաներ կտեսնես, որ նրանք անում են»:
14 Նա ինձ բերեց Եհովայի տան հյուսիսային մուտքի մոտ, և ես այնտեղ տեսա կանանց, որոնք նստած լաց էին լինում Թամուզ աստծու վրա:
15 Հետո նա ասաց. «Տեսնո՞ւմ ես սա, ո՛վ մարդու որդի: Դու է՛լ ավելի գարշելի բաներ կտեսնես»:+
16 Նա տարավ ինձ Եհովայի տան ներսի գավիթ:+ Այնտեղ՝ Եհովայի տաճարի մուտքի մոտ՝ նախասրահի ու զոհասեղանի միջև, 25 տղամարդ կար: Նրանք կանգնած էին մեջքով դեպի Եհովայի տաճարը, իսկ դեմքով՝ դեպի արևելք. նրանք խոնարհվում էին արևի առաջ:+
17 Նա ասաց ինձ. «Տեսնո՞ւմ ես սա, մարդո՛ւ որդի: Մի՞թե Հուդայի ժողովրդի համար բավական չէ այն, որ գարշելի բաներ է անում, երկիրը բռնությամբ է լցրել+ և շարունակ վիրավորում է ինձ: Հիմա էլ նա ճյուղ* է մեկնում քթիս:
18 Այդ պատճառով ես ցասումս կթափեմ նրա վրա: Նրան չեմ խնայի ու չեմ կարեկցի:+ Չնայած որ բարձրաձայն կբղավի ականջիս մոտ, բայց նրան չեմ լսի»:+
Ծանոթագրություններ
^ Բռց.՝ «ձեռքը»:
^ Եբր. բառը հավանաբար վերաբերում է սողուններին, միջատներին և այլ փոքր կենդանի արարածների:
^ Խնկարկության անոթ:
^ Ակներևաբար, խոսքը կեղծ երկրպագության մեջ օգտագործվող ճյուղի մասին է:
