Զաքարիա 14։1-21
14 «Ահա գալիս է օրը՝ Եհովայի օրը, երբ քեզնից* վերցված ավարը իրար մեջ կբաժանեն՝ դեռ քո սահմաններից դուրս չեկած:
2 Ես բոլոր ազգերին կհավաքեմ Երուսաղեմի դեմ պատերազմի: Քաղաքը կգրավեն, տները կթալանեն և կանանց կբռնաբարեն: Քաղաքում ապրողների կեսը գերի կտարվի, բայց մնացած ժողովուրդը չի արտաքսվի քաղաքից:
3 Ես՝ Եհովաս, դուրս կգամ ու կմարտնչեմ այդ ազգերի դեմ,+ ինչպես անցյալում եմ մարտնչել թշնամիների դեմ:+
4 Այդ օրը ես ոտքերս կդնեմ Ձիթենյաց լեռան վրա,+ որը Երուսաղեմի դիմացն է՝ արևելյան կողմում: Եվ Ձիթենյաց լեռը մեջտեղից կճեղքվի՝ արևելքից* մինչև արևմուտք.* լեռան կեսը կշարժվի դեպի հյուսիս, իսկ մյուս կեսը՝ դեպի հարավ, ու մի մեծ հովիտ կառաջանա:
5 Եվ դուք կփախչեք իմ լեռների միջև գտնվող հովիտը. այդ հովիտը կհասնի մինչև Եսել: Դուք կփախչեք, ինչպես երկրաշարժից փախաք Հուդայի Օզիա թագավորի օրերում:+ Եվ ես՝ ձեր Աստված Եհովաս, կգամ, ու իմ բոլոր սրբերը կգան ինձ հետ:+
6 Այդ օրը պայծառ լույս չի լինի,+ և ամեն ինչ կքարանա:*
7 Դա կլինի այնպիսի մի օր, որը հայտնի կդառնա որպես Եհովայի օր:+ Այդ ժամանակ ցերեկ ու գիշեր չի լինի, և անգամ երեկոյան լուսավոր կլինի:
8 Այդ օրը Երուսաղեմից կենսատու ջրեր+ կհոսեն,+ կեսը՝ դեպի արևելյան ծովը,*+ կեսը՝ արևմտյան ծովը:*+ Ամառ թե ձմեռ այդպես կլինի:
9 Եվ ես՝ Եհովաս, կթագավորեմ ամբողջ երկրի վրա:+ Այդ օրը Եհովան կլինի միակը,+ որին կպաշտեն, և միայն իմ անունը կփառաբանեն:+
10 Ամբողջ երկիրը՝ Գեբայից+ մինչև Ռեմոն,+ որը Երուսաղեմից հարավ է գտնվում, Արաբայի+ պես ցածրադիր կդառնա: Իսկ Երուսաղեմը վեր կխոյանա իր տեղում և բնակեցված կլինի+ Բենիամինի դարպասից+ ընդհուպ մինչև Առաջին դարպասի տարածքը և մինչև Անկյան դարպասը, Անանայելի աշտարակից+ ընդհուպ մինչև թագավորի գինու հնձանները:
11 Մարդիկ կբնակվեն այնտեղ, և այն այլևս չի դատապարտվի կործանման:+ Երուսաղեմի ժողովուրդը ապահով կբնակվի:+
12 Ահա թե ինչ պատուհաս կբերեմ ես՝ Եհովաս, այն բոլոր ժողովուրդների վրա, որոնք պատերազմում են Երուսաղեմի դեմ.+ նրանք դեռ ոտքի վրա կանգնած կլինեն, բայց իրենց միսը կփտի, աչքերը կփտեն խոռոչներում, և լեզուն կփտի բերանում:
13 Այդ օրը ես՝ Եհովաս, խուճապ կտարածեմ նրանց մեջ: Ամեն ոք կբռնի իր ընկերոջը և ձեռք կբարձրացնի նրա վրա:*+
14 Հուդան նույնպես կմասնակցի Երուսաղեմում մղվող պատերազմին: Եվ նրանք կհավաքեն շրջակա բոլոր ազգերի հարստությունը՝ ոսկի, արծաթ և մեծ քանակությամբ հագուստ:+
15 Այդ պատուհասի պես պատուհաս կգա նաև ձիերի, ջորիների, ուղտերի, էշերի և թշնամու բանակներում եղող բոլոր անասունների վրա:
16 Երուսաղեմի վրա հարձակված ազգերից բոլոր նրանք, ովքեր ողջ կմնան, տարեցտարի կգան+ Երուսաղեմ, որ խոնարհվեն Թագավորի՝ Զորքերի տեր Եհովայի առաջ*+ և նշեն Տաղավարների* տոնը:+
17 Իսկ երկրի ազգերից նրանք, ովքեր չեն գա Երուսաղեմ և չեն խոնարհվի Թագավորի՝ Զորքերի տեր Եհովայի առաջ, անձրև չեն տեսնի:+
18 Եթե Եգիպտոսի ժողովուրդը չելնի ու չգա, նրանք էլ անձրև չեն տեսնի: Եվ ես՝ Եհովաս, նրանց վրա կբերեմ նույն պատուհասը, որ բերում եմ այն ազգերի վրա, որոնք չեն գալիս Տաղավարների տոնը նշելու:
19 Ահա այսպիսի պատիժ կգա Եգիպտոսի և մյուս բոլոր ազգերի վրա իրենց այն մեղքի համար, որ չեն գալիս Տաղավարների տոնը նշելու:
20 Այդ օրը «Սրբությունը Եհովայինն է»+ խոսքերը գրված կլինեն անգամ ձիերի զանգակների վրա: Եվ Եհովայի տան կաթսաները*+ նույնքան սուրբ կլինեն, որքան զոհասեղանի առաջ գործածվող թասերը:+
21 Երուսաղեմում և Հուդայում ամեն կաթսա* սուրբ կլինի ու կպատկանի ինձ՝ Զորքերի տեր Եհովայիս: Բոլոր նրանք, ովքեր կգան զոհ մատուցելու, դրանց մեջ կեփեն միսը: Այդ օրը Զորքերի տեր Եհովայի տանը այլևս քանանացի* չի լինի»:+
Ծանոթագրություններ
^ Խոսքը 2-րդ համարում հիշատակված քաղաքի մասին է:
^ Կամ՝ «արևածագից»:
^ Բռց.՝ «ծովը»:
^ Կամ՝ «կանշարժանա»՝ ասես ցրտից փայտացած:
^ Այսինքն՝ Միջերկրական ծովը:
^ Այսինքն՝ Մեռյալ ծովը:
^ Կամ՝ «և նրանք կհարձակվեն իրար վրա»:
^ Կամ՝ «Ժամանակավոր ծածկերի»:
^ Կամ՝ «պաշտեն Թագավորին՝ Զորքերի տեր Եհովային»:
^ Կամ՝ «լայնաբերան կաթսաները»:
^ Կամ՝ «լայնաբերան կաթսա»:
^ Կամ հնարավոր է՝ «առևտրական»:
