Զաքարիա 7։1-14
7 Դարեհ թագավորի իշխանության չորրորդ տարում՝ իններորդ ամսվա, այսինքն՝ քասղև* ամսվա չորրորդ օրը, Եհովան իր խոսքը հաղորդեց Զաքարիային:+
2 Բեթելի բնակիչները Սարասարին, Ռեգեմմելեքին ու նրա մարդկանց ուղարկել էին, որ Եհովայի բարեհաճությունը խնդրեն*
3 և մարգարեներին ու Զորքերի տեր Եհովայի տանը* ծառայող քահանաներին հարցնեն. «Պե՞տք է արդյոք լաց լինենք և ուտելիքից հրաժարվենք* հինգերորդ ամսում,+ ինչպես որ արել ենք* այսքան տարի»:
4 Զորքերի տեր Եհովան իր խոսքը հաղորդեց ինձ.
5 «Ասա երկրի ողջ ժողովրդին ու քահանաներին. «Երբ դուք 70 տարի+ շարունակ հինգերորդ և յոթերորդ ամիսներին+ ծոմ էիք պահում ու ողբում, մի՞թե ինձ համար էիք ծոմ պահում:
6 Իսկ երբ ուտում էիք ու խմում, մի՞թե ձեզ համար չէիք ուտում ու խմում:
7 Չէ՞ որ դուք պետք է հնազանդվեիք իմ՝ Եհովայիս խոսքերին, որոնք ես ասում էի առաջվա մարգարեների միջոցով,+ երբ Երուսաղեմն ու նրա շրջակա քաղաքները դեռ բնակեցված էին ու խաղաղություն էին վայելում, երբ Նեգևում ու Շեֆելայում դեռ բնակչություն կար»»:
8 Եհովան կրկին իր խոսքը հաղորդեց Զաքարիային.
9 «Ահա թե ինչ է ասում Զորքերի տեր Եհովան. «Ճշմարիտ արդարությամբ դատեք,+ իրար հետ հավատարիմ սիրով+ ու գթասրտությամբ վարվեք:
10 Մի՛ խաբեք այրուն ու որբին,*+ պանդուխտին+ ու աղքատին+ և ձեր սրտերում չարիք մի՛ ծրագրեք միմյանց դեմ»:+
11 Բայց ձեր հայրերը անուշադրության էին մատնում այս խոսքերը,+ համառորեն թիկունք էին դարձնում+ ու փակում իրենց ականջները, որ չլսեն:+
12 Նրանք իրենց սիրտը քարի* պես կարծր էին դարձրել+ և չէին հնազանդվում այն օրենքներին* ու խոսքերին, որ Զորքերի տեր Եհովան իր ոգով հաղորդում էր առաջվա մարգարեների միջոցով:+ Ուստի Զորքերի տեր Եհովան իր մեծ բարկությունը թափեց նրանց վրա:+
13 «Ինչպես որ նրանք չէին լսում, երբ ես* էի կանչում,+ այնպես էլ ես չէի լսում, երբ նրանք էին կանչում,+– ասում է Զորքերի տեր Եհովան:–
14 Եվ ես, փոթորիկ բերելով, նրանց ցրիվ տվեցի բոլոր ազգերի մեջ, այն ազգերի, որոնց նրանք չէին ճանաչում:+ Եվ երկիրը ամայացավ, ու այլևս անցուդարձ անող չկար:+ Նրանց պատճառով այդ ցանկալի երկիրը զարհուրելի տեսարան դարձավ»»:
Ծանոթագրություններ
^ Տես հավելված Բ15:
^ Բռց.՝ «երեսը փափկացնեն»:
^ Կամ՝ «տաճարում»:
^ Բռց.՝ «լաց լինեմ և ուտելիքից հրաժարվեմ»:
^ Բռց.՝ «արել եմ»:
^ Կամ՝ «անհայր երեխային»:
^ Եբր. բառը կարող է վերաբերել ադամանդին, զմռնիտին (հղկաքար) կամ այլ կարծր քարի:
^ Կամ՝ «ուսուցմանը», «առաջնորդությանը»:
^ Բռց.՝ «նա»:
