Ծննդոց 15։1-21
15 Դրանից հետո Եհովան տեսիլքում ասաց Աբրամին. «Մի՛ վախեցիր,+ Աբրա՛մ: Ես վահան եմ քեզ համար:+ Քո վարձատրությունը շատ մեծ է լինելու»:+
2 Աբրամն էլ ասաց. «Գերիշխա՛ն Տեր Եհովա, ինչպե՞ս ես վարձատրելու ինձ: Չէ՞ որ ես դեռ անզավակ եմ, և դամասկոսցի Եղիեզերն է ժառանգելու իմ տունը»:+
3 Ապա ավելացրեց. «Դու ինձ սերունդ+ չես տվել, և իմ տան ծառան* է լինելու իմ ժառանգը»:
4 Բայց Եհովան, ի պատասխան, այսպես ասաց. «Քո ժառանգը ոչ թե այդ մարդն է լինելու, այլ քո իսկ որդին»:*+
5 Հետո դուրս տարավ նրան ու ասաց. «Վեր նայիր երկինք, խնդրեմ, և հաշվիր աստղերը, եթե կարող ես»: Ապա ասաց. «Քո սերունդը այդքան շատ կլինի»:+
6 Աբրամը հավատաց Եհովային,+ և դրա համար Նա արդար համարեց նրան:+
7 Հետո Աստված ասաց. «Ես Եհովան եմ, որ քեզ հանեցի քաղդեացիների Ուր քաղաքից, որպեսզի այս երկիրը քեզ տամ որպես սեփականություն»:+
8 Աբրամը հարցրեց. «Գերիշխա՛ն Տեր Եհովա, ինչպե՞ս հավաստիանամ, որ այն ինձ է պատկանելու»:
9 Նա էլ պատասխանեց. «Վերցրու երեք տարեկան չծնած կով, երեք տարեկան էգ այծ, երեք տարեկան արու ոչխար, մի տատրակ ու մի մատղաշ աղավնի»:
10 Ուստի Աբրամը վերցրեց այս բոլորը, մորթելով երկու մասի բաժանեց ու կտորները դրեց իրար դիմաց,* բայց թռչունները մասերի չբաժանեց:
11 Մորթված կենդանիների վրա սկսեցին գիշատիչ թռչուններ իջնել, սակայն Աբրամը քշում էր դրանց:
12 Երբ արևն արդեն մայր էր մտնում, Աբրամի վրա խոր քուն եկավ: Եվ ահա մի սարսափազդու խավար պատեց նրան:
13 Աստված ասաց Աբրամին. «Հաստատ իմացիր, որ քո սերունդները պանդուխտ կլինեն օտար երկրում, և այնտեղի ժողովուրդը կստրկացնի նրանց ու 400 տարի կչարչարի:+
14 Բայց ես կդատեմ այն ազգին, որը կստրկացնի նրանց,+ և դրանից հետո նրանք դուրս կգան շատ բարիքներով:+
15 Իսկ դու խաղաղությամբ կննջես քո նախահայրերի հետ* և խոր ծերության հասած՝ կթաղվես:+
16 Նրանք այստեղ+ կվերադառնան չորրորդ սերնդում, քանի որ ամորհացիների մեղքը դեռ չի հասել իր գագաթնակետին»:*+
17 Երբ արևն արդեն մայր էր մտել, և թանձր խավար էր իջել, մի ծխացող հնոց հայտնվեց, և մի այրվող ջահ անցավ այդ կտորների միջով:
18 Այդ օրը Եհովան ուխտ կապեց Աբրամի հետ՝+ ասելով. «Քո սերնդին եմ տալու այս երկիրը՝+ Եգիպտոսի գետից մինչև մեծ գետը՝ Եփրատը,+
19 այսինքն՝ կենեցիների,+ կենեզացիների, կեդմոնացիների,
20 քետացիների,+ փերեզացիների,+ ռաֆայիմների,+
21 ամորհացիների, քանանացիների, գերգեսացիների ու հեբուսացիների+ երկիրը»:
Ծանոթագրություններ
^ Բռց.՝ «որդին»:
^ Բռց.՝ «նա, ով առաջ կգա քո ընդերքից»:
^ Այդ ժամանակներում կենդանուն երկու մասի բաժանելը և այդ մասերի միջով անցնելը մի սովորույթ էր, որով ուխտ էին կապում:
^ Բռց.՝ «կգնաս քո նախահայրերի մոտ»:
^ Կամ՝ «դեռ չի եկել ամորհացիներին պատժելու ժամանակը»:
