Հեսու 10։1-43
10 Երբ Երուսաղեմի թագավոր Ադոնիսեդեկը լսեց, որ Հեսուն գրավել է Գային ու այն կործանել է, որ Գայիի ու դրա թագավորի+ հետ վարվել է այնպես, ինչպես Երիքովի ու դրա թագավորի+ հետ էր վարվել, և որ Գաբաոնի բնակիչները Իսրայելի հետ խաղաղություն են կնքել+ ու նրանց հետ են ապրում,
2 տագնապեց,+ որովհետև Գաբաոնը թագավորանիստ քաղաքների պես մեծ քաղաք էր: Այն Գայիից+ մեծ էր, ու այնտեղի բոլոր տղամարդիկ ռազմիկներ էին:
3 Երուսաղեմի թագավոր Ադոնիսեդեկը մարդ ուղարկեց Քեբրոնի+ թագավոր Հոհամի, Հերիմութի թագավոր Փիրամի, Լաքիսի թագավոր Հաբիեի և Եգլոնի թագավոր+ Դաբիրի մոտ, որ ասի.
4 «Օգնե՛ք ինձ, եկեք հարձակվե՛նք Գաբաոնի վրա, որովհետև նա խաղաղություն է կնքել Հեսուի և ամբողջ Իսրայելի հետ»:+
5 Ուստի ամորհացիների+ հինգ թագավորները՝ Երուսաղեմի թագավորը, Քեբրոնի թագավորը, Հերիմութի թագավորը, Լաքիսի թագավորը և Եգլոնի թագավորը, հավաքվեցին և իրենց զորքերի հետ գնացին ու բանակ դրեցին Գաբաոնի դիմաց, որ պատերազմեն նրա դեմ:
6 Այդ ժամանակ գաբաոնացիները մարդ ուղարկեցին Գաղգաղայում+ գտնվող բանակատեղի՝ Հեսուի մոտ, որ ասի. «Ձեռք մի՛ քաշիր քո ծառաներից:+ Շտապ արի ու փրկիր մեզ, օգնիր: Լեռնային շրջանում բնակվող ամորհացիների բոլոր թագավորները համախմբվել են մեր դեմ»:
7 Ուստի Հեսուն, նրա հետ նաև բոլոր պատերազմող տղամարդիկ ու զորավոր ռազմիկները+ դուրս եկան Գաղգաղայից:
8 Եհովան ասաց Հեսուին. «Չվախենա՛ս նրանցից,+ որովհետև քո ձեռքն եմ տվել նրանց:+ Նրանցից և ոչ մեկը չի կարողանա դիմադրել քեզ»:+
9 Գաղգաղայից դուրս գալով՝ Հեսուն ամբողջ գիշեր քայլեց դեպի Գաբաոն և, հասնելով այնտեղ, անսպասելիորեն հարձակվեց թշնամիների վրա:
10 Եհովան նրանց խառնաշփոթի մեջ գցեց Իսրայելի առաջ:+ Իսրայելացիները Գաբաոնում սկսեցին ջարդել ամորհացիներին և Բեթ-Օրոն բարձրացող ճանապարհով նրանց հետապնդելով ու կոտորելով՝ հասան մինչև Ազեկա ու Մակեդա:
11 Երբ նրանք Բեթ-Օրոնի զառիվայրով փախչում էին իսրայելացիներից, Եհովան մինչև Ազեկա նրանց վրա երկնքից խոշոր կարկտահատեր թափեց, ու նրանք մահացան: Կարկտից մահացածները ավելի շատ էին, քան իսրայելացիների սրից ընկածները:
12 Այդ օրն էր, որ երբ Եհովան իսրայելացիների աչքի առաջ ջախջախեց ամորհացիներին, Հեսուն Իսրայելի առաջ Եհովային ասաց.
«Արեգա՛կ, կա՛նգ առ+ Գաբաոնի վրա,+Եվ դո՛ւ, լուսի՛ն, Այելոնի հովտի վրա»:
13 Այդ ժամանակ արեգակը կանգ առավ, և լուսինը իր տեղում մնաց, մինչև որ ժողովուրդը վրեժ առավ իր թշնամիներից: Մի՞թե այս մասին գրված չէ «Յաշար»* գրքում:+ Արեգակը կանգ առավ երկնքի կենտրոնում ու չշտապեց մայր մտնել գրեթե ամբողջ օրը:
14 Սրա նման օր երբևէ չէր եղել և ոչ էլ հետո եղավ, որ Եհովան այս ձևով լսեր մարդու ձայնը,+ որովհետև Եհովան պատերազմում էր Իսրայելի համար:+
15 Դրանից հետո Հեսուն Իսրայելի ողջ զորքի հետ վերադարձավ բանակատեղի՝ Գաղգաղա:+
16 Մինչ այդ հինգ թագավորները փախան Մակեդա+ ու թաքնվեցին քարայրի մեջ:
17 Հեսուին տեղեկացրին այդ մասին՝ ասելով. «Հինգ թագավորներին գտել են Մակեդայում՝+ քարայրի մեջ թաքնված»:
18 Հեսուն ասաց. «Քարայրի բերանին մեծ քարեր գլորեք և մարդիկ նշանակեք, որ նրանց հսկեն:
19 Իսկ մյուսներդ մի՛ կանգնեք. հետապնդե՛ք ձեր թշնամիներին և թիկունքից հարվածե՛ք նրանց:+ Թույլ մի՛ տվեք, որ իրենց քաղաքները մտնեն, որովհետև ձեր Աստված Եհովան ձեր ձեռքն է տվել նրանց»:
20 Հեսուն և իսրայելացի ռազմիկները կոտորեցին նրանց՝ ջախջախելով գրեթե ամբողջ զորքը, իսկ կենդանի մնացածները փախան ու ամրացված քաղաքները մտան:
21 Դրանից հետո բոլոր իսրայելացի ռազմիկները ապահով վերադարձան Հեսուի մոտ՝ Մակեդայում գտնվող բանակատեղի: Ոչ ոք այլևս չհամարձակվեց որևէ բան ասել* իսրայելացիների դեմ:
22 Հեսուն ասաց. «Բացե՛ք քարայրի մուտքը, այդ հինգ թագավորներին հանե՛ք այնտեղից ու ինձ մո՛տ բերեք»:
23 Ուստի այդ հինգ թագավորներին՝ Երուսաղեմի թագավորին, Քեբրոնի թագավորին, Հերիմութի թագավորին, Լաքիսի թագավորին և Եգլոնի թագավորին,+ քարայրից հանեցին ու նրա մոտ բերեցին:
24 Երբ այս թագավորներին բերեցին Հեսուի մոտ, նա կանչեց բոլոր իսրայելացիներին և իր հետ պատերազմի գնացած զորապետներին ասաց. «Մոտեցե՛ք և ձեր ոտքերը այս թագավորների ծոծրակների՛ն դրեք»: Նրանք էլ մոտեցան և իրենց ոտքերը նրանց ծոծրակներին դրեցին:+
25 Հեսուն ասաց նրանց. «Մի՛ վախեցեք և մի՛ սարսափեք:+ Քա՛ջ և ամո՛ւր եղեք, որովհետև Եհովան այսպես է անելու ձեր բոլոր թշնամիներին, որոնց դեմ դուք պատերազմելու եք»:+
26 Դրանից հետո Հեսուն նրանց սպանեց և հինգ գերաններից* կախեց: Մինչև երեկո նրանք այդ գերաններից կախված մնացին:
27 Արևամուտին Հեսուն հրամայեց, որ նրանց իջեցնեն գերաններից+ ու գցեն այն քարայրը, որտեղ նրանք թաքնվել էին: Հետո քարայրի բերանին մեծ քարեր դրեցին, որոնք մինչև այսօր այնտեղ են:
28 Այդ օրը Հեսուն գրավեց Մակեդան+ և դրա բնակիչներին սրի քաշեց: Դրա թագավորին ու այնտեղ եղող բոլոր մարդկանց* կոտորեց. ոչ մեկին կենդանի չթողեց:+ Մակեդայի թագավորի+ հետ նա վարվեց այնպես, ինչպես վարվել էր Երիքովի թագավորի հետ:
29 Այնուհետև Հեսուն Իսրայելի ողջ զորքի հետ Մակեդայից գնաց Լեբնա ու պատերազմեց Լեբնայի+ դեմ:
30 Եհովան այս քաղաքը ու դրա թագավորին+ էլ իսրայելացիների ձեռքը տվեց: Նրանք քաղաքն ու այնտեղ եղող բոլոր մարդկանց սրի քաշեցին. ոչ մեկին կենդանի չթողեցին: Լեբնայի թագավորի հետ էլ վարվեցին այնպես, ինչպես Երիքովի թագավորի հետ էին վարվել:+
31 Ապա Հեսուն և իր հետ Իսրայելի ողջ զորքը Լեբնայից գնացին Լաքիս,+ այնտեղ բանակ դրեցին ու պատերազմեցին դրա դեմ:
32 Եհովան Լաքիսը իսրայելացիների ձեռքը տվեց, ու նրանք երկրորդ օրը քաղաքը գրավեցին: Նրանք այնտեղ եղող բոլոր մարդկանց սրի քաշեցին,+ ինչպես որ Լեբնայում էին արել:
33 Գազերի+ թագավոր Հորամը օգնության եկավ Լաքիսին, սակայն Հեսուն նրան ու նրա ժողովրդին էլ ջախջախեց. ոչ ոք կենդանի չմնաց:
34 Այնուհետև Հեսուն և իր հետ Իսրայելի ողջ զորքը Լաքիսից գնացին Եգլոն,+ այնտեղ բանակ դրեցին ու պատերազմեցին դրա դեմ:
35 Այդ օրը նրանք գրավեցին քաղաքը և դրա բնակիչներին սրի քաշեցին. այնտեղ եղող բոլոր մարդկանց այդ օրը բնաջնջեցին, ինչպես որ Լաքիսում էին արել:+
36 Հետո Հեսուն և իր հետ Իսրայելի ողջ զորքը Եգլոնից գնացին Քեբրոն+ ու պատերազմեցին դրա դեմ:
37 Նրանք գրավեցին այն ու սրի քաշեցին բոլոր մարդկանց, ինչպես նաև թագավորին ու շրջակա քաղաքների բոլոր բնակիչներին. ոչ ոք կենդանի չմնաց: Հեսուն այդ քաղաքը ավերեց, ինչպես որ Եգլոն քաղաքն էր ավերել, ու այնտեղ եղող բոլոր մարդկանց կործանեց:
38 Վերջապես Հեսուն Իսրայելի ողջ զորքի հետ շրջվեց ու գնաց Դաբիր+ և պատերազմեց դրա դեմ:
39 Նա գրավեց այն և սրի քաշեց այնտեղի բոլոր բնակիչներին, դրա թագավորին, ինչպես նաև բոլոր շրջակա քաղաքների բնակիչներին:+ Այնտեղի բոլոր մարդկանց նա կոտորեց.+ ոչ ոք կենդանի չմնաց: Դաբիրի ու դրա թագավորի հետ էլ վարվեց այնպես, ինչպես որ վարվել էր Քեբրոնի, նաև Լեբնայի ու դրա թագավորի հետ:
40 Հեսուն նվաճեց ամբողջ լեռնային շրջանը, Նեգևը, Շեֆելան+ և սարալանջերը ու պարտության մատնեց այնտեղի բոլոր թագավորներին: Ոչ ոքի նա ողջ չթողեց. բոլորին բնաջնջեց,+ ինչպես որ Իսրայելի Աստված Եհովան պատվիրել էր:+
41 Հեսուն նվաճեց Կադես-Բառնեայից+ մինչև Գազա+ ընկած տարածքները, ինչպես նաև Գեսեմի+ ամբողջ տարածքը ընդհուպ մինչև Գաբաոն:+
42 Հեսուն այս բոլոր թագավորներին հաղթեց ու նրանց տարածքները նվաճեց մեկ արշավանքով, որովհետև Իսրայելի Աստված Եհովան էր մարտնչում Իսրայելի համար:+
43 Դրանից հետո Հեսուն Իսրայելի ողջ զորքի հետ վերադարձավ բանակատեղի՝ Գաղգաղա:+
