Սաղմոսներ 68։1-35
Նվագավարին: Դավթի երգը:
68 Թող Աստված գործի անցնի, թող նրա թշնամիները ցրվեն,Թող նրան ատողները նրանից փախչեն:+
2 Ինչպես քամին ծուխն է քշում, այդպես էլ դու նրանց քշիր:
Ինչպես որ մոմն է հալվում կրակից,Այդպես թող անօրենները չքվեն Աստծու առաջից:+
3 Իսկ արդարները թող ցնծան,+Աստծու առաջ թող բերկրանքով լցվեն,Թող ուրախությունից հրճվեն:
4 Գովերգեք* Աստծուն, փառաբանեք նրա անունը երգով,+Գովերգեք նրան, ով արշավում է անապատների միջով:*
Յահ* է նրա անունը,+ նրա առաջ ցնծացեք:
5 Աստված, ով իր սուրբ բնակավայրում է,+Որբերի* հայրն ու այրիների պաշտպանն է:*+
6 Աստված տուն ու տեղ է տալիս միայնակ մնացածներին,+Ազատություն ու բարեկեցություն է շնորհում գերիներին,+Մինչդեռ համառները* պետք է արևախանձ երկրում ապրեն:+
7 Ո՛վ Աստված, երբ դու առաջնորդում էիր քո ժողովրդին,+Երբ անցնում էիր անապատով, (Սելա)
8 Երկիրը ցնցվում էր:+
Աստված երկնքից անձրև էր թափում,Աստծու՝ Իսրայելի Աստծու առաջ Սինա լեռը ցնցվում էր:+
9 Ո՛վ Աստված, դու հորդառատ անձրև բերեցիր,Քո ուժասպառ ժողովրդին ուժով լցրիր:
10 Նրանք քո ճամբարում բնակվեցին,+Քո բարությամբ, ո՛վ Աստված, դու հոգ տարար խեղճերին:
11 Եհովան հրաման է արձակում.
Մեծ բանակ են կանայք, որ բարի լուրն են հռչակում:+
12 Թագավորներն ու իրենց զորքերը փախչում են,+ նրանք փախչում են:
Ավարից բաժին են ստանում կանայք, ովքեր տանը սպասում են:+
13 Թեև դուք, տղամարդի՛կ, ստիպված էիք խարույկների* մեջ պառկել,Սակայն կստանաք աղավնու արծաթապատ թևեր,Որոնք ունեն ընտիր* ոսկուց փետուրներ:
14 Երբ Ամենակարողը այդ երկրի թագավորներին ցիրուցան արեց,+Սելմոնի վրա ձյուն թափվեց:*
15 Բասանի+ լեռը վեհապանծ լեռ է,*Բասանի լեռը բարձր գագաթներով լեռ է:
16 Ո՛վ բարձրագագաթ լեռ,Ինչո՞ւ ես նախանձով նայում այն լեռանը,Որն Աստված իր համար բնակավայր է ընտրել.+
Եհովան առհավետ կբնակվի այնտեղ:+
17 Աստծու մարտակառքերը բյուրավոր* են, հազար հազարավորներ:+
Եհովան Սինա լեռից իր սուրբ վայրն է եկել:+
18 Դու վեր ելար բարձունքը,+ ո՛վ Յահ, ո՛վ Աստված,Եվ գերեվարեցիր մարդկանց:
Դու այդ մարդկանց վերցրիր, որ պարգևներ դարձնես,+Այո՛, նույնիսկ համառներին,+ որ նրանց մեջ բնակվես:
19 Թող փառաբանվի Եհովան, ով ամեն օր կրում է մեր բեռը,+Թող փառաբանվի ճշմարիտ Աստված՝ մեր Փրկիչը: (Սելա)
20 Ճշմարիտ Աստված մեզ փրկություն բերող Աստված է.+
Եհովան՝ Գերիշխան Տերը, մեզ մահից ազատում է:+
21 Այո՛, Աստված կջարդի իր թշնամիների գլուխները,Հանցավոր ուղուց չհրաժարվողների մազածածկ գանգերը:+
22 Եհովան ասել է. «Անգամ Բասանից+ նրանց կիջեցնեմ,Ծովի խորքերից էլ նրանց հետ կբերեմ:
23 Կբերեմ, որ ձեր ոտքերը թշնամիների արյան մեջ թաթախեք,+Եվ ձեր շները նրանց արյունը լիզեն»:
24 Ո՛վ Աստված, մարդիկ տեսնում են քո հաղթական երթը,Իմ Աստծու՝ իմ Թագավորի երթը դեպի սուրբ վայրը:+
25 Առջևից երգիչներն են գնում, հետևից՝ լարային գործիքներ նվագողները,+Իսկ նրանց միջև՝ դափ զարկող երիտասարդ աղջիկները:+
26 Հավաքված բազմության մեջ Աստծուն՝ Եհովային փառաբանեք,Դուք, որ առաջ եք եկել Իսրայելի Սկզբնաղբյուրից, նրան գովաբանեք:+
27 Ահա կրտսերը՝ Բենիամինը,+ ով հպատակեցնում է մարդկանց,Նաև Հուդայի իշխանները՝ իրենց աղմկոտ բազմության ուղեկցությամբ,Զաբուղոնի իշխանները և Նեփթաղիմի իշխանները:
28 Ձեր Աստվածը որոշեց զորություն տալ ձեզ:
Ցույց տուր զորությունդ, ո՛վ Աստված,Ինչպես որ արդեն արել ես հօգուտ մեզ:+
29 Թագավորները ընծաներ կբերեն քեզ համար,+Դրանք կբերեն Երուսաղեմում գտնվող քո տաճար:+
30 Սաստիր եղեգների մեջ ապրող գազաններին,Ցլերի+ և նրանց հորթերի նախիրներին,Որ այդ ազգերը քո առաջ խոնարհվեն ու արծաթ բերեն:*
Ցիրուցան արա ռազմասեր ժողովուրդներին:
31 Եգիպտոսից բրոնզե իրեր կբերեն,*+Քուշը* կշտապի Աստծուն նվերներ մատուցել:
32 Ո՛վ երկրի թագավորություններ, Աստծուն գովերգեք,+Եհովայի պատվին փառաբանական երգեր երգեք: (Սելա)
33 Գովերգեք նրան, ով արշավում է՝ հինավուրց երկինքների երկնքին հեծած:+
Ահա նրա ձայնը, նրա հզոր ձայնը որոտում է:
34 Ընդունեք, որ Աստված զորավոր է:+
Նա Իսրայելի վրա տարածում է իր մեծ իշխանությունը,Երկնքից ցույց է տալիս իր զորությունը:
35 Աստված, ով իր վեհապանծ սրբարանում է, ակնածանք է ներշնչում:+
Նա Իսրայելի Աստվածն է, ով ուժ է տալիս իր ժողովրդին ու զորացնում:+
Թող փառք տրվի Աստծուն:
Ծանոթագրություններ
^ Կամ՝ «Նվագակցությամբ գովերգեք»:
^ Կամ հնարավոր է՝ «ամպերի վրա»:
^ «Յահ» անունը «Եհովա» անվան կրճատ ձևն է:
^ Կամ՝ «Անհայր երեխաների»:
^ Բռց.՝ «դատավորն է»:
^ Կամ՝ «ըմբոստները»:
^ Կամ հնարավոր է՝ «փարախների»:
^ Կամ՝ «դեղնականաչավուն»:
^ Կամ՝ «Ասես ձյուն տեղաց Սելմոնի վրա»:
^ Բռց.՝ «Աստծու լեռն է»:
^ Կամ՝ «տասնյակ հազարավոր»:
^ Կամ հնարավոր է՝ «կոխկրտեն արծաթը»:
^ Կամ հնարավոր է՝ «Եգիպտոսից դեսպաններ կգան»:
^ Կամ՝ «Եթովպիան»:
