Օսեե 1։1-11
1 Սա է Եհովայի խոսքը, որ նա Բեերիի որդի Օսեեի* միջոցով հաղորդեց Հուդայի թագավորներ+ Օզիայի,+ Հովաթամի,+ Աքազի+ ու Եզեկիայի+ օրոք և Իսրայելի թագավոր Հերոբովամի՝+ Հովասի+ որդու օրերում:
2 Երբ Եհովան սկսեց իր խոսքը հաղորդել Օսեեի միջոցով, Եհովան նրան ասաց. «Գնա՛, ամուսնացի՛ր մի կնոջ հետ, որը կսկսի անբարոյականություն* անել և դրա հետևանքով երեխաներ կունենա, որովհետև այս երկրի ժողովուրդը, անբարոյականություն անելով,* լիովին հեռացել է Եհովայից»:+
3 Օսեեն գնաց ու ամուսնացավ Գոմերի՝ Դաբելայիմի աղջկա հետ: Նա հղիացավ և որդի ծնեց նրա համար:
4 Եհովան ասաց Օսեեին. «Նրա անունը Հեզրայել* դիր, որովհետև կարճ ժամանակ հետո ես Հեուի+ արքայատոհմին* պատասխանատվության կկանչեմ Հեզրայելի արյունահեղությունների համար և վերջ կդնեմ Իսրայելի տան թագավորական իշխանությանը:+
5 Այդ օրը Հեզրայելի հովտում* կկոտրեմ Իսրայելի աղեղը»:
6 Գոմերը կրկին հղիացավ ու մի աղջիկ ունեցավ: Աստված ասաց Օսեեին. «Նրա անունը Լորուհամա* դիր, որովհետև այլևս գթություն ցույց չեմ տա+ Իսրայելի տան հանդեպ և անպայման կվռնդեմ նրանց:+
7 Բայց Հուդայի տան հանդեպ գթասիրտ կլինեմ+ և կփրկեմ նրանց. ես՝ նրանց Աստված Եհովաս,+ կփրկեմ ոչ թե աղեղով, սրով, պատերազմով, ձիերով ու ձիավորներով, այլ իմ զորությամբ»:+
8 Երբ Գոմերը կաթից կտրեց Լորուհամային, նորից հղիացավ ու մի որդի ունեցավ:
9 Աստված ասաց Օսեեին. «Նրա անունը Լոամմի* դիր, որովհետև դուք իմ ժողովուրդը չեք, և ես ձեր Աստվածը չեմ:
10 Սակայն հետո իսրայելացիների* թիվը ծովի ավազի չափ կլինի, որը հնարավոր չէ չափել կամ հաշվել,+ և որտեղ նրանց ասվեց՝ «Դուք իմ ժողովուրդը չեք»,+ այնտեղ նրանց կասվի՝ «Դուք կենդանի Աստծու որդիներն եք»:+
11 Հուդայի ժողովուրդը և Իսրայելի ժողովուրդը կմիավորվեն,+ իրենց համար մի առաջնորդ կընտրեն և դուրս կգան այն երկրից:* Դա մեծ օր կլինի Հեզրայելի համար»:+
Ծանոթագրություններ
^ Կրճատ ձևն է «Օսեիա» անվան, որը նշանակում է «Յահի կողմից փրկված», «Յահը փրկել է»:
^ «Օսեե» գրքի ողջ համատեքստում այս բառը կարող է թարգմանվել նաև «մարմնավաճառություն», «անառակություն՝ ամեն պատահածի հետ»:
^ Սա կարող է վերաբերել նաև հոգևոր պոռնկությանը:
^ Բռց.՝ «տունը»:
^ Նշանակում է «Աստված սերմ կցանի»:
^ Կամ՝ «հարթավայրում»:
^ Նշանակում է «նա, ում չեն գթացել»:
^ Նշանակում է «իմ ժողովուրդը չէ»:
^ Բռց.՝ «Իսրայելի որդիների»:
^ Ըստ ամենայնի, խոսքը այն երկրի մասին է, որտեղ նրանք գերի էին տարվելու:
