1 Տարեգրություն 12։1-40
-
Դավթի իշխանությանը թիկունք կանգնողները (1-40)
12 Սրանք են այն մարդիկ, որ եկան Դավթի մոտ՝ Սիկելակ,+ երբ նա թաքնվում էր Կիսի որդի Սավուղից:+ Նրանք այն զորեղ ռազմիկներից էին, որոնք Դավթին օգնում էին պատերազմում:+
2 Նրանք զինված էին նետ ու աղեղով և կարողանում էին թե՛ աջ, թե՛ ձախ ձեռքով+ պարսատիկով քարեր նետել+ ու աղեղով նետեր արձակել: Այդ ռազմիկները Սավուղի եղբայրներից էին՝ Բենիամինի ցեղից:+
3 Գլխավորը Աքիեզերն էր, հետո Հովասը. նրանք գաբաացի+ Սամաայի որդիներն էին: Նրանց հետ էին Հեզիելն ու Փալետը՝ Ազամոթի+ որդիները, Բարաքան, անաթոթացի Հեուն,
4 գաբաոնացի+ Իսմայիան, որը 30 զորեղ ռազմիկներից մեկն էր+ և նրանց գլխավորը, նաև Երեմիան, Հաազիելը, Հոհանանը, գադերացի Հոզաբադը,
5 Ելիոզան, Հերիմոթը, Բաալիան, Սեմարիան, արիֆացի* Սափատիան,
6 Եղկանան, Եսիան, Ազարիելը, Հովեզերը, Կորխի սերնդից Հեսբաամը,+
7 ինչպես նաև Հովելան ու Զաբադիան՝ գեդորացի Հերոամի որդիները:
8 Երբ Դավիթը գտնվում էր անապատում՝ ապաստարանում,+ Գադյաններից ոմանք նրա կողմն անցան: Նրանք զորեղ, պատերազմելու համար մարզված ռազմիկներ էին, որոնք միշտ պատրաստ էին պահում մեծ վահաններն ու նիզակները: Նրանց երեսները առյուծի երեսի էին նման, և նրանք արագավազ էին, ինչպես լեռնային այծեղջերուները:
9 Գլխավորը Եզերն էր, երկրորդը՝ Աբդիան, երրորդը՝ Եղիաբը,
10 չորրորդը՝ Մասմանան, հինգերորդը՝ Երեմիան,
11 վեցերորդը՝ Եթթին, յոթերորդը՝ Ելիելը,
12 ութերորդը՝ Հոհանանը, իններորդը՝ Ելզաբադը,
13 տասներորդը՝ Երեմիան, և տասնմեկերորդը՝ Մաքաբանան:
14 Նրանք Գադի սերնդից էին+ և զորագլուխներ էին: Ամենաթույլը կարող էր 100-ի դիմադրել, իսկ ամենաուժեղը՝ 1 000-ի:+
15 Այս մարդիկ էին, որ առաջին ամսին անցան Հորդանանը, երբ այն դուրս էր եկել իր ափերից, և հովիտների բնակիչներին վռնդեցին դեպի արևելք ու արևմուտք:
16 Դավթի մոտ՝ ապաստարան,+ գնացին նաև Բենիամինի և Հուդայի ցեղերից որոշ մարդիկ:
17 Դավիթը նրանց ընդառաջ դուրս եկավ ու ասաց. «Եթե խաղաղությամբ եք եկել ինձ մոտ և ուզում եք օգնել, ես պատրաստ եմ ընդունելու ձեզ որպես իմ ընկերների: Բայց եթե եկել եք, որ ինձ թշնամիներիս ձեռքը մատնեք, այնինչ ես ոչ մի վատ բան չեմ արել, ապա թող մեր նախահայրերի Աստվածը տեսնի ու դատի»:+
18 Այդ ժամանակ Աստծու ոգին իջավ* Ամեսայի վրա,+ որը 30 ռազմիկների գլխավորն էր, և նա ասաց.
«Քոնն ենք մենք, ո՛վ Դավիթ, և քեզ հետ ենք, ո՛վ Հեսսեի որդի:+
Խաղաղությո՛ւն, խաղաղությո՛ւն քեզ, խաղաղությո՛ւն նաև քեզ օգնողին,Քանի որ քո Աստվածը օգնում է քեզ»:+
Դավիթը նրանց ընդունեց և ջոկատների հրամանատարներ նշանակեց:
19 Մանասեի ցեղից ոմանք նույնպես անցան Դավթի կողմը, երբ նա փղշտացիների հետ գնաց Սավուղի դեմ պատերազմելու: Բայց Դավիթը չօգնեց փղշտացիներին,+ քանի որ նրանց կառավարիչները միասին խորհրդակցելուց հետո իրեն հետ էին ուղարկել: Նրանք ասել էին. «Նա իր տիրոջ՝ Սավուղի կողմը կանցնի և դա կանի մեր կյանքի* գնով»:+
20 Երբ նա գնաց Սիկելակ,+ Մանասեի ցեղից նրա կողմն անցան Ադնան, Հոզաբադը, Հեդիելը, Միքայելը, Հոզաբադը, Եղիուսը և Սալթին. սրանք Մանասեի ցեղի հազարապետներն էին:+
21 Նրանք օգնեցին Դավթին հրոսակախմբի* դեմ կռվում, որովհետև բոլորը զորեղ ու քաջ մարդիկ էին:+ Նրանք զորագլուխներ դարձան:
22 Ամեն օր մարդիկ գալիս միանում էին Դավթին՝+ նրան օգնելու համար, և ի վերջո նրանք մի մեծ բանակ դարձան՝ Աստծու բանակի պես:+
23 Սա է այն մարդկանց թիվը, որոնք սպառազինված եկան Դավթի մոտ՝ Քեբրոն,+ որպեսզի Սավուղի թագավորությունը նրան տան, ինչպես որ պատվիրել էր Եհովան:+
24 Հուդայի ցեղից նիզակ ու մեծ վահան կրող 6 800 սպառազինված մարդ կար,
25 Շմավոնի ցեղից՝ 7 100 զորեղ ու քաջ մարդ:
26 Ղևտացիներից 4 600 մարդ կար:
27 Հովիադան+ Ահարոնի սերունդների+ առաջնորդն էր, և նրա հետ 3 700 մարդ կար:
28 Նրանց թվում էին Սադոկը,+ որը զորեղ ու քաջ երիտասարդ էր, և իր գերդաստանից՝ 22 գլխավորներ:
29 Բենիամինի ցեղից՝ Սավուղի եղբայրներից,+ 3 000 մարդ կար, որոնց մեծ մասը մինչ այդ պաշտպանում էր Սավուղի տան շահերը,
30 Եփրեմյաններից՝ 20 800 զորեղ, քաջ և իրենց գերդաստաններում անվանի մարդիկ:
31 Մանասեի ցեղի մի կեսից 18 000 մարդ կար, որոնք անուններով ընտրված էին, որպեսզի գային ու Դավթին թագավոր դարձնեին:
32 Իսաքարի ցեղից 200 գլխավորներ կային, որոնք կարողանում էին գնահատել իրավիճակը և հասկանալ, թե որ դեպքում ինչ պետք է անի Իսրայելը: Նրանց բոլոր եղբայրները հնազանդվում էին նրանց հրամաններին:
33 Զաբուղոնի ցեղից զինվորական ծառայության համար պիտանի 50 000 մարդ կար, որոնք շարվում էին մարտական կարգով՝ ամեն տեսակ զենքով զինված: Այս բոլոր մարդիկ, որոնք միացան Դավթին, ամբողջովին նվիրված էին նրան:*
34 Նեփթաղիմի ցեղից 1 000 գլխավորներ կային, և նրանց հետ՝ նիզակ ու մեծ վահան կրող 37 000 մարդ:
35 Դանի ցեղից մարտական կարգով շարվող 28 600 մարդ կար,
36 Ասերի ցեղից՝ զինվորական ծառայության համար պիտանի և մարտական կարգով շարվող 40 000 մարդ:
37 Հորդանանի մյուս կողմում ապրող Ռուբենի ցեղից,+ Գադի ցեղից և Մանասեի ցեղի մյուս կեսից ամեն տեսակ զենք կրող 120 000 զինվոր կար:
38 Մարտական կարգով շարվող այս բոլոր զինվորները վճռականությամբ լի եկան Քեբրոն՝ Դավթին ողջ Իսրայելի թագավորը դարձնելու: Մնացած իսրայելացիներն էլ էին համամիտ, որ Դավթին թագավոր դարձնեն:+
39 Նրանք երեք օր մնացին Դավթի մոտ և կերան-խմեցին, քանի որ իրենց եղբայրները պատրաստություն էին տեսել իրենց համար:
40 Նաև այն մարդիկ, որ ապրում էին մոտակայքում, նույնիսկ Իսաքարի, Զաբուղոնի և Նեփթաղիմի տարածքներում բնակվողները, էշերի, ուղտերի, ջորիների և խոշոր եղջերավոր անասունների վրա բարձած ուտելիք էին բերում: Բերում էին ալյուրից պատրաստված մեծ քանակությամբ ուտեստեղեն, չորացրած թզի ու չամիչի բլիթներ,* գինի, յուղ, ինչպես նաև խոշոր եղջերավոր անասուններ ու ոչխարներ՝ որպես մսացու. Իսրայելում ուրախություն էր տիրում:
Ծանոթագրություններ
^ Կամ՝ «Արիֆի սերնդից»:
^ Բռց.՝ «պարուրեց»:
^ Բռց.՝ «գլուխների»:
^ Թալանելու նպատակով արշավանքի դուրս եկած զինված մարդկանց խումբ:
^ Կամ՝ «երկատված սիրտ չունեին»:
^ Խոսքը իրար սեղմած ու բլիթների տեսք տված թզերի, ինչպես նաև չամիչների մասին է:
