2017 թ. մայիսի 6-ին մոտ 130 Եհովայի վկաներ օգնեցին մաքրելու Լվովի (Ուկրաինա) մոտակայքում գտնվող Բրյուխովիչիի անտառը։ Կամավորները, որոնք 22–80 տարեկան էին, ապրում և աշխատում են Եհովայի վկաների՝ Ուկրաինայի մասնաճյուղում, որը անտառին մոտ է գտնվում։ Ընդամենը երեք ժամում նրանք մաքրեցին 50 հեկտար (120 ակր) տարածք և հավաքեցին մոտ 600 կիլոգրամ (1 300 ֆունտ) աղբ։

Լվովի անտառային տնտեսության գլխավոր ինժեներ Միխայլո Սպլավինսկին ասում է. «Եհովայի վկաները առաջինն են, ովքեր սկսած 2014 թ.-ից՝ կանոնավորաբար մասնակցում են անտառը մաքրելու գործին»։

«Անտառում երկու պատճառով է աղբ հավաքվում,— նշում է պրն Սպլավինսկին։— Առաջին՝ որոշ մարդիկ իրենց հետևից աղբ են թողնում։ Երկրորդ՝ շինարարական աղբը և այլ թափոններ բեռնատարներով բերում են անտառ և դատարկում այնտեղ»։

Աղբը լուրջ խնդիր է անտառների համար։ Պրն Սպլավինսկին ասում է. «Աղբը քայքայվում է երկար ժամանակի ընթացքում»։ Այնուհետև այն «աղտոտում է գրունտային ջրերը, ինչը հանգեցնում է էկոլոգիական խնդիրների»։ Դեն նետված ապակիները կարող են մեծացնել արևի ճառագայթների ինտենսիվությունը և այդպիսով անտառային հրդեհների պատճառ դառնալ։ Իսկ կոտրված ապակիներն ու դեն գցված ներարկիչները վտանգավոր են հատկապես փոքր երեխաների համար։ «Այս խնդիրներից կարելի է խուսափել, եթե աղբը հեռացվի»,— ասում է նա։

3 300 հեկտար (8 100 ակր) անտառային տարածք մաքրելը դժվար գործ է։ «Մենք ընդամենը հինգ անտառապահ ունենք,— բացատրում է պրն Սպլավինսկին,— ուստի չենք կարող մաքրել այդքան մեծ տարածք։ Այդ պատճառով տարին մեկ անգամ բնակիչներին խնդրում ենք, որ օգնեն մեզ անտառը մաքրելու գործում»։

Ձեռնոցներով, պոլիէթիլենային տոպրակներով և փոցխերով սպառազինված՝ Վկա կամավորները հավաքում են շշերը, մեքենայի անվադողերը, ապակիները, մետաղյա իրերը, թղթերը, պլաստիկ առարկաները և օգտագործված ներարկիչները։ Արդյունքում, ինչպես նկատել է Իգոր Ֆեդակը, որը այդ տեղանքում որպես անտառապահ է աշխատում, «Եհովայի վկաների հոգածության տակ գտնվող տարածքը շատ մաքուր է դարձել»։

Թեև դեռ օրենքով չի պահանջվում, սակայն կամավորները տեսակավորում են աղբը՝ առանձնացնելով ապակին, թուղթը և պլաստիկը, ինչը այն վերամշակելու հնարավորություն կտա։ Այնուհետև թափոնները վերամշակող տեղի մի ընկերություն մշակում է աղբը։ Բացի այդ, 2016 թ.-ից ի վեր Վկաները վճարում են այն բանի համար, որ իրենց հավաքած աղբը հեռացվի։ «Շնորհակալություն եմ հայտնում Եհովայի վկաներին մեզ աջակցելու համար,— ասում է պրն Ֆեդակը։— Նրանք շատ են օգնում մեզ»։

Վկաները ուրախությամբ են մասնակցում անտառի մաքրության աշխատանքներին, որոնք կազմակերպվում են ամեն տարի։ Նրանք սիրով նպաստում են իրենց բնակիչների բարօրությանը և անտառի մաքրությանը։ Վոլկերը արտահայտում է Վկաների մեջ տարածված հետևյալ տեսակետը՝ ասելով. «Մաքրություն անելը իմ արժանապատվությունից ցածր գործ չէ։ Ուրիշների համար ինչ-որ բան անելը պատվաբեր է և գոհունակության զգացումով է ինձ լցնում»։

Անժելիկան ավելացնում է. «Ինձ համար կարևոր է ոչ թե այն, թե ով է աղբը թողել, այլ այն, թե ես ինչ կարող եմ անել աղբը հեռացնելու համար»։ Լոիսը, որը 78 տարեկան է, նույնպես մասնակցել է այդ աշխատանքներին։ Նա ասում է. «Երբ զբոսնելիս աղբ ես տեսնում, վրդովվելու փոխարեն՝ ավելի լավ է վերցնես այն ու դեն նետես»։

«Սովորաբար մարդիկ տեսնում են, որ մենք փողկապով ու գեղեցիկ հագուստով մեր հավատալիքների մասին խոսում ենք ուրիշների հետ,— ասում է Վյեսլավը։— Բայց մենք նաև պատրաստ ենք թևերը վեր քաշած աշխատելու, որ մաքրենք անտառը կամ այլ գործ անենք հօգուտ ուրիշների»։