1987թ.-ին Վենեսուելայի Վալենսիա քաղաքում՝ «Պլասա Մոնումենտալ» ցլամարտի արենայում, հավաքվել էր 63580 մարդ։ Շատերը ամբողջ գիշեր ավտոբուսով ճանապարհորդել էին այս միջոցառմանը ներկա լինելու համար։ Դիմելով նրանց՝ Եհովայի վկաների Կառավարիչ մարմնի անդամ Լայման Սուինգլը ասաց. «Դուք այլևս փոքր մասնաճյուղ չեք։ Ձեր մասնաճյուղը միջին չափի է։ Իսկ դա նշանակում է, որ շուտով կլինեք այն երկրների թվում, որոնց քարոզիչների թիվը անցնում է 100000-ը»։

1987թ.-ին Վենեսուելայում կար 38000 քարոզիչ, ովքեր ակտիվորեն հռչակում էին Թագավորության բարի լուրը։ Այդ ժամանակ միայն ութ երկրներում էր քարոզիչների թիվը գերազանցում 100000-ը։

Ամբողջ աշխարհում Եհովայի վկաների աճը տպավորիչ է եղել։ Առաջին աշխարհամարտի ժամանակ միայն մի քանի հազար հոգի էին հռչակում Եհովայի Թագավորության մասին։ Սակայն դա այդպես չմնաց։ Եհովայի վկաների 1943թ. Տարեգրքում գրվեց. «1942թ. հաշվետվությունը, չնայած որ կապ չլինելու պատճառով ամբողջական չէր, ցույց է տալիս, որ Եհովան գործը օրհնում է.... Ստացված հաշվետվությունների համաձայն՝ ամբողջ աշխարհում 106000-ից ավելի քարոզիչներ մասնակցել են [բարի լուրի քարոզչության] գործին»։ Նույնիսկ Երկրորդ համաշխարհային պատերազմի փոթորկոտ տարիների ընթացքում շատերը դրական արձագանքեցին Աստվածաշնչի ճշմարտությանը։ 1950թ.-ին միայն ԱՄՆ-ում 100000-ից ավել քարոզիչ կար։

Հաջորդ երկիրը Նիգերիան էր, որտեղ 1974-ին քարոզիչների թիվը հասավ 100000-ի։

Դրանից մեկ տարի անց Բրազիլիայում ու Գերմանիայում նույնպես քարոզիչների թիվը գերազանցեց 100000-ը։ Չորս մայրցամաքներում գրանցված աճը վկայում էր այն մասին, որ աստվածաշնչյան ճշմարտությունը ամենուրեք գրավում է մարդկանց։

Ամբողջ աշխարհում բարի լուրն ընդունողների թիվը շարունակում էր աճել, ինչպեսև մարգարեացվել էր Աստվածաշնչում. «Քիչը հազար կդառնա, ու ամենափոքրը՝ հզոր ազգ։ Ես՝ Եհովաս, կարագացնեմ դա իր ժամանակին» (Եսայիա 60:22)։

Ըստ 2014թ. ծառայողական տարվա հաշվետվության՝ այն երկրների քանակը, որտեղ քարոզիչների թիվը անցել է 100000-ը, արդեն 24 է։ 2007-ից այդ երկրների թվում է նաև Վենեսուելան։ Ամբողջ աշխարհում Եհովայի վկաների 115416 ժողովներում ծառայում է 8201545 քարոզիչ։