2023 թ. մայիսի 20-ից հունիսի 11-ն ընկած ժամանակահատվածում Արգենտինայի չորս խոշոր քաղաքներում տեղի ունեցավ ՖԻՖԱ-ի աշխարհի երիտասարդական առաջնությունը։ Ակնկալվում էր, որ երեք շաբաթ տևող այս սպորտային իրադարձությանը Արգենտինայից և աշխարհի տարբեր երկրներից ավելի քան 400 000 մարդ ներկա կգտնվի։ Տարբեր վայրերում, տարբեր ժամերի գրականության ցուցատախտակներ տեղադրվեցին։ Շուրջ 500 եղբայրներ ու քույրեր մասնակցեցին այս նախաձեռնությանը և ավելի քան 500 հրատարակություններ տարածեցին։ Նրանք շատ անհատների ուղղորդեցին jw.org կայք, որպեսզի վերջիններս Աստվածաշնչից գտնեն իրենց հարցերի պատասխանները։

Մի տեղացի տղամարդ մոտեցավ ցուցատախտակին և ասաց, որ մարզվելու ընթացքում սիրում է փոդքասթներ լսել։ Եղբայրներից մեկը նրան ցույց տվեց jw.org կայքը և բացատրեց՝ ինչպես բեռնել մեր հրատարակությունների աուդիո տարբերակը։ Այդ մարդն ասաց, որ մեր հրատարակությունները կներառի իր աուդիո ցանկում։

Մրցաշարի բազմաթիվ միջազգային այցելուների ուշադրությունը գրավելու նպատակով հրատարակությունները ցուցադրվում էին ինը լեզուներով։ Բացի այդ՝ շատ քարոզիչներ տարբեր լեզուներով սովորել էին ողջույնի մի քանի խոսքեր, որպեսզի հաղորդակցվեին ցուցատախտակին մոտեցող մարդկանց հետ։ Մի եղբայր, ով մասնակցել է այս նախաձեռնությանը, ասում է. «Այն ողջ աշխատանքը, որ կատարվեց տարբեր ծագում ունեցող մարդկանց քարոզելու համար, փաստեց, թե որքան բարի ու անկողմնակալ է Եհովան։ Դա ինձ անսահման ուրախությամբ լցրեց»։

Ուշագրավ է, որ միջոցառման կազմակերպիչները Եհովայի վկաներին թույլ տվեցին տեղադրել գրականության ցուցատախտակներ այնպիսի վայրերում, որտեղ անվտանգության նկատառումներից ելնելով՝ սովորաբար ներկաներին չի թույլատրվում միասին հավաքվել։ Կազմակերպիչներից մեկը, մեկնաբանելով իրենց կայացրած որոշումը, ասաց. «Մենք գիտենք, որ Եհովայի վկաները խաղաղ են և վտանգ չեն ներկայացնում»։ Արդյունքում անվտանգության անձնակազմը լավ վկայություն ստացավ։

Քաջալերական է տեսնել, որ Եհովայի ծառաները ամեն ջանք թափում են, որպեսզի հանդիպեն ամեն տեսակ մարդկանց և ողջ երկրով մեկ ցանեն ճշմարտության սերմերը (Ժողովող 11։6)։