Մարդու իրավունքների եվրոպական դատարանը (այսուհետ՝ ՄԻԵԴ) միաձայն վճռեց, որ Բելգիայի կառավարությունը խտրականություն է դրսևորել Եհովայի վկաների նկատմամբ՝ չեղարկելով Բրյուսելի տարածաշրջանի ինը ժողովներին նախկինում տրված գույքահարկի արտոնությունը։ «Եհովայի վկաների քրիստոնեական կազմակերպությունը և այլք ընդդեմ Բելգիայի» գործով վճիռը, որը հրապարակվեց 2022 թ. ապրիլի 5-ին, կարող է նպաստել դավանանքի մեր ազատությանը ոչ միայն Բելգիայում, այլև եվրոպական այլ երկրներում։

Բրյուսելի տարածաշրջանի բոլոր կրոններն ազատված էին հարկերից մինչև 2018 թ.։ Սակայն այդ տարի տարածաշրջանը փոփոխեց իր հարկային օրենսդրությունը և որոշեց, որ միայն վեց «ճանաչված կրոններ» կարող են օգտվել այդ արտոնությունից: Օրենքի այդ փոփոխության պատճառով Եհովայի վկաները ստիպված էին լինելու մեծ գումարներ վճարել Բրյուսելում գտնվող Թագավորության սրահների գույքի համար, որը տարեկան կազմում է գրեթե 45 000 եվրո (49 025 դոլար):

ՄԻԵԴ-ը որոշեց, որ հարկերից ազատվելու արտոնությունը միայն պետության կողմից վեց «ճանաչված կրոններին» տրամադրելով՝ Բրյուսելի տարածաշրջանը խտրական վերաբերմունք է դրսևորում Եհովայի վկաների նկատմամբ և խախտում է Մարդու իրավունքների եվրոպական կոնվենցիան։

Իր որոշումը կայացնելիս ՄԻԵԴ-ը նաև նշեց, որ Բելգիայի կառավարությունը ստել է՝ ասելով, թե Եհովայի վկաները կարող են դիմել պետական ճանաչում ստանալու համար։ ՄԻԵԴ-ը նշեց, որ Բելգիայում միայն արդարադատության նախարարն ունի պետական ճանաչման գործընթաց սկսելու իրավունք, և որ այս կարգավիճակը շնորհվում է կառավարության կողմից կամայական կերպով։

Իր պաշտոնական վճռում ՄԻԵԴ-ը նշեց, որ Բելգիայի կողմից պետական ճանաչման գործընթացը «իրականում ենթադրում է կամայականության վտանգ»՝ հավելելով՝ «խելամիտ չէ ակնկալել, որ գույքահարկից արտոնություն ստանալու համար կրոնական խմբերը կդիմեն ճանաչման համար, եթե երաշխիք չունեն, որ արդար որոշում կկայացվի»: Փոխարենը դատարանը հորդորեց Բելգիային լինել «չեզոք և անաչառ» կրոնական խմբերի, օրինակ՝ Եհովայի վկաների հետ կապված գործերում։

ՄԻԵԴ-ի վճիռը ընդգծում է, որ պետական իշխանությունները չեն կարող որոշել՝ արդյոք որոշ կրոնական համոզմունքներ անկեղծ են, և թե ինչպես մարդիկ պետք է իրականացնեն իրենց պաշտամունքը։ Այն նաև կօգնի կանխել այլ եվրոպական պետությունների կողմից հարկային օրենքների ընդունումը, որոնք կարող են խտրական վերաբերմունք համարվել մեր կազմակերպության նկատմամբ:

Մենք շնորհակալ ենք Եհովային բոլոր օրինական հաղթանակների համար, որոնք օգնում են մեզ փառաբանել իր անունը (Հայտնություն 15։4)։