Վերջերս ավարտին հասավ Կոլումբիայի մասնաճյուղի շինությունների լայնածավալ վերանորոգումը։ Նախագիծը սկսվել էր 2019 թ. փետրվարին և ավարտվեց 2023 թ. մարտին։ Վերանորոգմանը մասնակցեցին 200-ից ավելի եղբայրներ ու քույրեր, այդ թվում՝ կամավորներ, որ եկել էին ԱՄՆ-ից, Անգլիայից, Ավստրալիայից, Դոմինիկյան Հանրապետությունից, Կանադայից և Չիլիից։

2023 թ. հունիսի 1-ից սկսած՝ այցելուները հնարավորություն են ունեցել առաջին անգամ շրջայց կատարելու վերանորոգված շինություններում։ Եղբայր Ջոն Ռոդրիգեսը, ով մկրտվել է COVID-19 համավարակի ընթացքում, նախկինում երբեք մասնաճյուղ չէր այցելել։ Նա ասաց. «Այստեղ կատարվող աշխատանքը արտացոլում է Եհովայի սերն ու զորությունը։ Այնքա՜ն ուրախ ու երախտապարտ եմ, որ պատկանում եմ այս գեղեցիկ կազմակերպությանը»։ Մեկ այլ եղբայր նշեց. «Ինձ շատ է տպավորում, թե եղբայրներն ինչպես են կիրառության մեջ դրել նորագույն տեխնոլոգիաներն ու միջոցները։ Վերանորոգումը փաստում է, որ Եհովայի կազմակերպությունը միշտ առաջ է շարժվում»։

Մասնաճյուղը գտնվում է Կոլումբիայի մայրաքաղաք Բոգոտայից 42 կմ (26 մղոն) հյուսիս-արևմուտք և կազմակերպում է Բոլիվիայի ու Կոլումբիայի աստվածապետական գործունեությունը։ Մասնաճյուղը հրատարակություններ է տպագրում Կոլումբիայի, Էկվադորի, Պերուի և Վենեսուելայի համար։ Վերանորոգված շինությունների շահագործումը կխթանի այս տարածքներում մեր գործունեության առաջընթացին։ Ընդհանուր հաշվով ձևափոխվել են ավելի քան 350 սենյակներ և գրասենյակներ, ինչպես նաև կառուցվել են 156 նոր գրասենյակներ։ Բացի այդ՝ կառուցվել են նոր դասասենյակներ և կոնֆերանս-սենյակներ, իսկ շրջայցի երթուղին ավելի երկար է դարձել։

Եղբայր Թեյթ Բուլեն, ով շինարարական կոմիտեի կոորդինատորն է, նշել է. «Չնայած COVID-19 համավարակի բերած դժվարություններին՝ Եհովան անշուշտ օրհնել է գործը։ Թեև շինարարական անձնակազմը կրճատվեց, բայց կամավորները սիրով այնպիսի գործեր կատարեցին, որոնց հետ կապված կրթություն չէին ստացել կամ փորձ չունեին։ Ճիշտ ինչպես Աստծու վաղեմի ծառաների դեպքում էր, Եհովայի ոգին նրանց էլ էր օգնում, որ արագ մասնագիտանան այդ արհեստներում»։

Վստահ ենք, որ մասնաճյուղի վերանորոգված շինությունները մեծապես կխթանեն հավատակիցների գործունեությանը և կնպաստեն քարոզիչների թվի աճին (Գործեր 1։8)։