Ավելի քան 20 տարի է՝ Կոլումբիայի մեր եղբայրները դատապարտյալներին աստվածաշնչյան անվճար կրթություն են տալիս։ 2018 թ. նոյեմբերի 30-ին «Պաուլո Ֆրեիրիի» անվան կրթական կենտրոնը գովասանագիր շնորհեց Եհովայի վկաներին Վալեդուպար քաղաքի կալանավայրում աստվածաշնչյան կրթական գործունեություն իրականացնելու համար։ Ներկայումս 50 դատապարտյալներ մասնակցում են աստվածաշնչյան դասընթացներին։

Կոլումբիայում Եհովայի վկաները 65 կալանավայրերում 782 աստվածաշնչյան դասընթացներ են անցկացնում։ 1996 թ.-ից ի վեր մկրտվել են 60 անհատներ։

Նեվեր Անտոնիո Կավադիան կալանավայրում սկսեց ուսումնասիրել Աստվածաշունչը և 1998 թ.-ին մկրտվեց։ 2007 թ.-ին նա ազատ արձակվեց Վալեդուպար քաղաքի կալանավայրից։ Խոսելով իր ստացած կրթության օգուտների մասին՝ նա ասում է. «Աստվածաշնչյան սկզբունքները պաշտպանում էին ինձ կալանավայրում և օգնում իմաստությամբ վարվելու։ Դրանք նաև մղում էին ինձ մեծ փոփոխություններ անելու կյանքումս և չկորցնելու հույսս»։

Ողջ աշխարհում մենք՝ Եհովայի վկաներս, ջանք ենք թափում՝ քարոզելու դատապարտյալներին, քանի որ գիտենք, որ Եհովայի կամքն է, «որ ամեն տեսակ մարդիկ ճշմարտության մասին ճշգրիտ գիտելիքներ ստանան և փրկվեն» (1 Տիմոթեոս 2։4)։