Փոթորիկներն ու տևական հեղեղները վտանգավոր իրավիճակ են ստեղծել Կոնգոյի Դեմոկրատական Հանրապետությունում, որը գտնվում է կենտրոնական Աֆրիկայում։ Եհովայի վկաների Կոնգոյի մասնաճյուղը Կինշասայում հայտնում է, որ շատ Վկաներ են տուժել հեղեղների պատճառով։ Ցավոք, մոլեգնած տարերքը խլել է Կինշասայում բնակվող մեր եղբայրներից մեկի կյանքը։

Կոնգոյի մասնաճյուղը (Կինշասա) հայտնել է հետևյալը.

• Կասաի նահանգում, որը գտնվում է Կոնգոյի Հանրապետության հարավ-արևմուտքում, ուժգին քամիներն ու հորդառատ անձրևը ավերել են Վկա ընտանիքներին պատկանող 6 տուն։

• Երկրի հյուսիս-արևմուտքում՝ Սուդ-Ուբանգի նահանգում գտնվող մի Թագավորության սրահ ամբողջովին հեղեղվել է։ Այս Թագավորության սրահից 3 ժողով էր օգտվում, որտեղ ընդհանուր առմամբ ծառայում է 69 քարոզիչ։ Ջրհեղեղի հետևանքով տուժել է նաև այդ տարածքում ապրող 22 ընտանիք։ Մասնաճյուղը հատուկ ռահվիրա և մեկ այլ երեց է նշանակել, ովքեր հոգևորապես կքաջալերեն այս մեկուսի տարածքում ապրող մեր եղբայրներին ու քույրերին, ինչպես նաև հոգ կտանեն, որ վերջիններս նյութական աջակցություն ստանան։

• Չոպո նահանգում Կոնգո գետի ափամերձ տարածքներում ապրող մեր հավատակիցները ստիպված են եղել լքել իրենց տները։ Թագավորության սրահներից առնվազն մեկը հեղեղվել է։

• Ըստ Կինշասայի ժողովներից ստացված տեղեկությունների՝ առնվազն 80 ընտանիք տուժել է ջրհեղեղից։

Ջրհեղեղի հետևանքով առաջացած հակասանիտարական վիճակը կարող է համաճարակների պատճառ դառնալ, ուստի մասնաճյուղը քայլեր է ձեռնարկել՝ իրազեկելու քարոզիչներին, թե ինչպես կարող են զերծ մնալ հիվանդություններից։

Չնայած ստեղծված իրադրությանը՝ մեր եղբայրներն ու քույրերը աջակցում են միմյանց նյութական հարցերում՝ տրամադրելով սնունդ և հագուստ։ Տուժածներին անհրաժեշտ օգնություն տրամադրելու համար նաև աղետից տուժածների աջակցության կոմիտեներ են կազմավորվել։

Մենք գիտենք, որ մեր աղոթքները, ինչպես նաև այն հոգևոր և նյութական աջակցությունը, որ ցույց է տալիս Եհովայի կազմակերպությունը, մխիթարության աղբյուր կդառնան բոլոր նրանց համար, ովքեր սգում են այս չափազանց դժվար ժամանակներում (Եսայիա 61։1, 2)։