2021 թ. օգոստոսի 4-ին լրացավ Եհովայի վկաների առաջին մեծամասշտաբ «Ուրախ ազգեր» միջազգային համաժողովի 75-ամյակը։ Համաժողովը անց էր կացվել Քլիվլենդի (Օհայո, ԱՄՆ) քաղաքային մարզադաշտում և դրա մոտ գտնվող լսարանում 1946 թ. օգոստոսի 4–11-ն ընկած ժամանակահատվածում։

Եղբայրները այս համաժողովը կազմակերպեցին Երկրորդ համաշխարհային պատերազմից կարճ ժամանակ անց։ Այնտեղ միանգամայն այլ ոգի էր տիրում՝ հակառակ այն ոգուն, որը տիրում էր աշխարհում պատերազմի ժամանակ։ Աշխարհի տարբեր մասերից հազարավոր եղբայրներ և քույրեր ներկա գտնվեցին համաժողովին։ Տարբեր ռասաների և տարբեր ծագում ունեցող մարդիկ խաղաղ և հանգիստ շփվում էին իրար հետ, մինչդեռ Միացյալ նահանգների տարբեր մասերում դեռ շարունակվում էր խտրականությունը սևամորթների և սպիտակամորթների մեջ։

«Ուրախ ազգեր» համաժողովի ժամանակ առաջին անգամն էր, որ 80 000-ից ավել Վկաներ հավաքվել էին մեկ վայրում։ Պատերազմի տարիներին եղբայրներն ու քույրերը չէին կարողանում կապ պահել միմյանց հետ, սակայն այժմ նրանք վայելում էին ջերմ շփում։ Համաժողովին ներկա էին 302 պատվիրակներ 32 երկրներից։ Համաժողովի վերջին օրը՝ կիրակի, Նաթան Նորը ներկայացրեց «Խաղաղության իշխանը» ելույթը։

Համաժողովը շատ լավ էր կազմակերպված, սակայն ամեն ինչ չէ, որ հարթ ընթացավ։ Հենց առաջին օրը այցելուների հետ կապված մեծ խնդիր առաջացավ։ Մարզադաշտը արդեն լիքն էր, սակայն մարդկանց հոսքը չէր դադարում։ Եղբայրները որոշեցին օգտագործել նաև հարակից մարզադաշտը, որպեսզի բոլորը կարողանան լսել երեկոյան ծրագիրը, որը սկսվելու էր 19։45-ին։ Բայց մի խնդիր կար. 2-րդ մարզադաշտում բեյսբոլի խաղեր էին անցկացվելու մինչև 18։30։

Սակայն երկրորդ խաղի ժամանակ անսպասելի անձրև ու ամպրոպ սկսվեց, և այցելուները մինչև խաղի ավարտը ազատեցին մարզադաշտը։ Քիչ անց եղանակը փոխվեց, և մոտ 50 000 Վկաներ գնացին մարզադաշտ՝ լսելու երեկոյան ծրագիրը։

«Ուրախ ազգեր» համաժողովի ընթացքում հայտարարվեց նոր ամսագրի՝ «Արթնացե՛ք»-ի, և Աստվածաշնչի ուսումնասիրության նոր ձեռնարկի՝ «Թող Աստված ճշմարիտ լինի» գրքի լույսընծայման մասին։ Բացի այդ՝ եղբայր Նորը հայտարարեց, որ ծրագրեր կան ընդլայնելու տպարանները Բրուքլինում (Նյու Յորք, ԱՄՆ) և 6 այլ մասնաճյուղերում։

Համաժողովի կարևորագույն մասերից էր մկրտությունը։ Մարզադաշտից ոչ շատ հեռու գտնվող Էրի լճում մկրտվեց 2 602 հոգի՝ 903 եղբայր և 1 699 քույր։ Ուշագրավ էին նաև «Դիտարանի» ուսումնասիրության և Աստվածապետական ծառայության դպրոցի ցուցադրությունները, ինչպես նաև 160 երաժիշտներից բաղկացած նվագախմբի կատարումները։

Այս համաժողովից հետո որոշ բաժիններ մինչ այժմ գործում են, օրինակ՝ սպասարկուների, առաջին օգնության, գտնված իրերի և տեղակայման բաժինները, ինչպես նաև համաժողովի նախագահի գրասենյակը։

Եղբայր Ռոն Լիթլը, որը երեց է ծառայում Փենսիլվանիա նահանգում, 11 տարեկան էր, երբ մասնակցեց համաժողովին հոր և եղբոր հետ։ Համաժողովի ութ օրերին նրանք քնել էին իրենց հոր բեռնատարում։

Եղբայր Լիթլը շատ լավ է հիշում «Արթնացե՛ք» պարբերագրի լույսընծայումը։ Նա ասում է. «Երբ հայտարարվեց «Արթնացե՛ք» պարբերագրի լույսընծայման մասին, բոլորը, պարբերագիրը ձեռքներին, այստեղից այնտեղ էին վազում ու առաջարկում նրան, ում ձեռքին, որ չէին տեսնում»։

Եղբայր Լիթլը, որն այժմ 86 տարեկան է, հիշում է, թե ինչ հիացմունքով էր լցվել՝ տեսնելով այդքան Վկաների՝ միասին հավաքված։ Նա ասում է. «Հիշում եմ, որ չէի ուզում՝ այդ ամենն ավարտվեր։ Այնքա՜ն ուրախ էինք»։

Մենք երախտապարտ ենք Եհովային մեր «սուրբ հավաքույթների» համար (Ղևտական 23։2)։