2024 թ. հունիսի 7-9-ը Գվադելուպայի Բե-Մաո կոմունայի «Vélodrome Amédée Détraux» մարզադաշտում կայացավ «Հռչակենք բարի լուրը» խորագրով առաջին հատուկ համաժողովը։ Ընդհանուր հաշվով՝ 2024 թ. հունիս-հոկտեմբեր ամիսներին 15 հատուկ համաժողովներ են անցկացվելու։ a COVID-19 համավարակի պատճառով 2020 թ. հատուկ համաժողովների չեղարկումից հետո առաջին անգամ է, որ հատուկ համաժողովներ են կազմակերպվել։

Տարբեր երկրներից հավատակիցներ հրավիրված են մասնակցելու այս հատուկ համաժողովներին որպես պատվիրակներ։ Ծրագրերից շատերն անցկացվելու են տարբեր լեզուներով՝ այս մեծամասշտաբ միջոցառումներին տալով միջազգային կոլորիտ։ Գվադելուպան զգաց այդ համը, երբ ծրագիրը միաժամանակ անցկացվեց անգլերենով, ֆրանսերենով, կրեոլով (Գվադելուպա) ու իսպաներենով։

Ահռելի աշխատանքներ են տարվել, որ միջազգային պատվիրակներին դիմավորելու համար ամեն բան պատրաստ լինի։ Գվադելուպայի 8 546 քարոզիչների ավելի քան կեսը կամավոր մասնակցել է նախապատրաստական աշխատանքներին, որ հնարավոր լինի ընդունել 11 երկրներից եկած 1 500 հյուրերին։ Մի քույր, ով իր ամուսնու հետ ներգրավված է եղել այս գործում, ասում է. «Սա իմ կյանքի լավագույն տարին էր, որը հավերժ հիշելու եմ։ Անթիվ-անհամար ժամեր անցկացնելով իմ եղբայրների ու քույրերի հետ և ուրախությամբ ուս ուսի աշխատելով՝ հնարավորություն ունեցա մի փոքր զգալու, թե ինչպիսի կյանք է լինելու նոր աշխարհում։ Հպարտ եմ, որ Եհովայի կազմակերպության մի մասնիկն եմ»։

Մեր համաշխարհային եղբայրության հետ միասին մենք վստահ ենք, որ 2024 թ. «Հռչակենք բարի լուրը» հատուկ համաժողովները կմիավորեն Աստծու ժողովրդին՝ փառք ու պատիվ բերելով մեր երկնային Հորը՝ Եհովային (Փիլիպպեցիներ 1։27)։