2023 թ. մայիսի 20-ին Կառավարիչ մարմնի անդամ եղբայր Մարկ Սանդերսոնը ներկայացրեց Իկալուիտի (Նունավուտ, Կանադա) նոր Թագավորության սրահի նվիրման ելույթը։ Ընդհանուր հաշվով՝ ծրագրին ֆիզիկապես ներկա էր 44 հոգի, իսկ 388-ը միացել էր տեսակապի միջոցով: Նունավուտը երկրագնդի ամենանոսր բնակեցված տարածքներից մեկն է։ Այն ունի 40 000-ից քիչ բնակիչ և մոտ 1 837 000 քառակուսի կիլոմետր (709 270 քառակուսի մղոն) տարածք: Ինչպես ավելի վաղ հաղորդվել էր jw.org կայքում, այս Թագավորության սրահը կառուցելիս մեր եղբայրները առանձնահատուկ դժվարություններ են հաղթահարել։ Բարի լուրը այս մեկուսի տարածք բերած անվախ Վկաները ստիպված էին դիմանալ ցուրտ եղանակին և հարմարվել դժվար տեղանքին։ Նվիրման ծրագրի ժամանակ խոսվեց նրանց վճռականության և հավատարմության մասին։

1976 թ.-ին քույր Մարգարեթ Գալին Մոնրեալից (Քվեբեկ) տեղափոխվեց 2 052 կիլոմետր (1 275 մղոն) հեռու գտնվող մի տարածք, որն այժմ հայտնի է Իկալուիտ անունով (Նունավուտ): Նա առաջին Վկան էր, ով քարոզեց այդ ընդարձակ և ամայի տարածքում։ Նույն տարի՝ ավելի ուշ, եղբայր Հանս Պինտարը, ով ծառայում էր որպես շրջանային վերակացու, իր կնոջ՝ Միներվայի հետ մեկ շաբաթով այցելեց քույր Գալիին՝ քաջալերելու և նրա հետ ծառայությանը մասնակցելու համար։

Այնուհետև 1983 թ.-ին Իկալուիտ մեկնեց նախանձախնդիր Վկաների մի փոքր խումբ։ Քարոզչական գործում նրանց համատեղ ջանքերի շնորհիվ մի տեղաբնիկ ընտանիք մկրտվեց։ Հաջորդ 20 տարիների ընթացքում Թագավորության խիզախ քարոզիչները բարի լուրը հայտնելու համար բազմաթիվ ճամփորդություններ կատարեցին դեպի այս մեկուսի շրջան։ 2008 թ.-ին Իկալուիտում խումբ հիմնվեց: 2010 թ.-ին այս փոքր խումբն արդեն դարձել էր ժողով և իր հանդիպումներն անցկացնում էր դպրոցի մարզադահլիճում։ Եղբայրների ու քույրերի ոգևորությանը չափ չկար, երբ 2022 թ. հոկտեմբերին տեղափոխվեցին իրենց նորակառույց Թագավորության սրահ։

Իկալուիտից բացի՝ հատուկ ռահվիրաները մյուսների հետ քարոզում էին նաև Նունավուտի այլ մեկուսի վայրերում։ Եղբայր Ջոել Թերիենը և նրա կինը՝ Շերիլը, նրանց թվում էին: Նրանք տեղափոխվեցին Բեյքեր լճի տարածք, որը Իկալուիտից 1 329 կիլոմետր (826 մղոն) դեպի արևմուտք է գտնվում: Եղբայր Թերիենը հիշում է. «Չնայած ցուրտ եղանակին, մեկուսացմանը և ծախսերին՝ արժեր զոհողություններ անել: Բեյքեր լճի մերձակայքում ապրող մարդկանց սրտաբուխ արձագանքից ակնհայտ էր, որ Եհովան օրհնում է մեզ։ Ուրախ էինք, որ հնարավորություն ունեինք աստվածաշնչյան բարի լուրը հայտնելու այնտեղ ապրող մարդկանց»։

Ջոզեֆ Ութաթնակը Բեյքեր լճի մոտակայքի այն բնակիչներից է, ով դրականորեն արձագանքեց Թագավորության բարի լուրին: Նա ընդունեց եղբայր Թերիենի՝ Աստվածաշնչի ուսումնասիրության առաջարկը և 2021 թ.-ին մկրտվեց։ Այժմ եղբայր Ութաթնակը միակ քարոզիչն է, ով ապրում է այդ տարածքում։ Երբ նա իմացավ, որ 2023 թ. մայիսին տեղի է ունենալու Իկալուիտի Թագավորության սրահի նվիրումը, զգալի ջանքեր գործադրեց, որպեսզի ներկա գտնվի ծրագրին։ Մկրտությունից հետո առաջին անգամ էր, որ նա Թագավորության սրահում հանդիպեց իր եղբայրներին ու քույրերին։ Նա ասաց. «Ես այնքան տպավորվեցի, երբ տեսա կառուցված Թագավորության սրահը։ Շատերը, ովքեր մասնակցել էին Սրահի շինարարությանը, տեղի բնակիչներ չէին և սովոր չէին մեր կլիմային ու կենսապայմաններին: Ակնհայտ էր, որ նրանց մղիչ ուժը Եհովայի և մերձավորի հանդեպ սերն էր»։

Ներկայում ընդհանուր հաշվով 178 եղբայրներ և քույրեր են ծառայում հյուսիսային տարածքների չորս ժողովներում։ Դրանցից մեկը գտնվում է Նունավուտում, երկուսը՝ հյուսիսարևմտյան տարածքներում, և մեկը՝ Յուկոնում։ Այս տարածքները Կանադայի ցամաքային տարածքի գրեթե 40 տոկոսն են կազմում: Ճիշտ է, Կանադայի ծայր հյուսիսում եղանակը ծայրահեղ ցուրտ է, իսկ տեղանքը՝ դժվարանցանելի, սակայն մեր հավատակիցները ջանք չեն խնայում, որ հանդիպեն տեղի բնակիչներին և այս հեռավոր տարածքներում քարոզեն բարի լուրը (Գործեր 1:8)։ Հիանում ենք նրանց վճռականությամբ։