2023 թ. ապրիլի 23-ին Հարավային Կորեայում տեղի ունեցած հանդիպման ժամանակ հայտարարվեց, որ չինական ժեստերի լեզվով լույս է տեսել «Աստվածաշունչ. Ավետարան ըստ Մատթեոսի» գիրքը։ Սա առաջին դեպքն է, որ չինական ժեստերի լեզվով աստվածաշնչյան գիրք է լույսընծայվում։ Ծրագրին ներկա էին մոտ 200 հոգի՝ Հարավային Կորեայի չինական ժեստերի երկու ժողովներից։ Թարգմանությունն այժմ առկա է jw.org կայքում և JW Library Sign Language հավելվածում։

Թարգմանչական խումբը ձգտում էր թարգմանել Աստվածաշնչի այս գիրքը բնական և լակոնիկ լեզվով։ Թարգմանիչներից մեկն այս առնչությամբ նշել է. «Թարգմանչական խմբի երեք անդամներից երկուսը խուլ են, ուստի հաճախ էինք քննարկում, թե ինչպես են մտածում խուլ մարդիկ։ Նրանց կարծիքը լսելով՝ ավելի հեշտ էր թարգմանել»։

Մեկ այլ թարգմանիչ էլ նշել է. «Այս նախագծում աշխատելը օգնեց ինձ պարզ հասկանալ, թե ինչ է արել Հիսուսը, ինչերի միջով է անցել և թե ինչեր է սովորեցրել երկրի վրա եղած ժամանակ»։

Մի խուլ քարոզիչ, ով ներկա էր եղել ծրագրին, պատմել է. «Նախքան այս լույսընծայումը չինական ժեստերի լեզվով ընդամենը մի քանի համար էր առկա։ Ասես՝ փազլի միայն մի քանի մասերը առկա լինեին։ Այժմ «Մատթեոս» գրքի լույսընծայմամբ ես կարող եմ տեսնել ողջ պատկերը»։

Մեկ այլ խուլ քարոզիչ էլ նշել է. «Եհովայի կազմակերպության կողմից թողարկված ժեստերի լեզվով հրատարակությունները և այժմ էլ «Մատթեոս» գիրքը օգնել են ինձ հասկանալ, թե Եհովան որքան շատ է ցանկանում օգնել խուլերին և թե որքան շատ է սիրում նրանց»։

Շնորհակալ ենք Եհովային այս լույսընծայման համար, որը կօգնի մեր հավատակիցներին երկրպագել Աստծուն «ոգով ու ճշմարտությամբ» (Հովհաննես 4։24)։