2024 թ. հոկտեմբերի 9-ին 3-րդ աստիճանի ուժգնության «Միլթոն» փոթորիկը հարվածեց Ֆլորիդայի ծովածոցին (ԱՄՆ) և շարժվելով առաջ՝ մեծ ավերածություններ պատճառեց նահանգի տարբեր հատվածներում։ Այս ահեղ փոթորկից գրեթե երկու շաբաթ առաջ նույն տարածքին վնասաբեր հարված էր հասցրել «Հելեն» փոթորիկը՝ ջրհեղեղների պատճառ դառնալով։ «Միլթոն» փոթորիկը առաջացրեց մինչև իսկ 289 կմ/ժ (180 մղոն/ժամ) արագության քամիներ։ Մերձափնյա մի շարք տարածքներում շուրջ 45 սմ (18 դյույմ) քանակության տեղումներ և 3 մ (10 ֆուտ) բարձրության ալիքներ եղան, որոնց հետևանքով էլ մեծաքանակ ջրհեղեղներ առաջացան։

Բացի այդ՝ «Միլթոն» փոթորկի հետևանքով Ֆլորիդայի հարավային և կենտրոնական շրջաններում առնվազն 38 տոռնադոներ գոյացան, ինչի հետևանքով նույնպես համատարած ավերածություններ եղան։ Գրեթե 80 000 մարդ մնացել է առանց էլեկտրականության, առնվազն 24-ը զոհվել է։

• Մեր եղբայրներից ու քույրերից ոչ ոք չի զոհվել։

• 2 քարոզիչ լուրջ վնասվածքներ է ստացել։

• 4 քարոզիչ թեթև վնասվածքներ է ստացել։

• 9 949 քարոզիչներ տարհանվել են կամ ստիպված են եղել լքել իրենց տները։

• 16 տուն ավերվել է։

• 235 տուն լրջորեն վնասվել է։

• 1 398 տուն թեթևակի է վնասվել։

• 1 Թագավորության սրահ թեթևակի վնասվել է։

• 30 Թագավորության սրահ ներկա պահին էլեկտրականություն չունի և չի կարող շահագործվել։

• «Միլթոն» փոթորկի հարվածից երկու օր առաջ ԱՄՆ մասնաճյուղը նամակ ուղարկեց խոցելի գոտում գտնվող ավելի քան 800 ժողովներին և տարհանման համար օգտակար տեղեկություն տրամադրեց, ինչը կօգներ բոլոր նրանց, ովքեր կնախընտրեին հեռանալ այդ տեղանքից։

• Շրջանային վերակացուները և տեղի երեցները հոգևորապես քաջալերում և գործնական օգնություն են տրամադրում «Հելեն» և «Միլթոն» փոթորիկներից տուժած հավատակիցներին։

• Աղետից տուժածներին օգնելու 3 կոմիտե է կազմավորվել՝ երկու փոթորիկների հետ կապված հումանիտար աշխատանքները կոորդինացնելու նպատակով։

• Ջորջիա և Հարավային Կարոլինա նահանգներից (ԱՄՆ) հարյուրավոր Վկաներ սիրով իրենց տուն են ընդունել տեղահան եղած եղբայրներին ու քույրերին։

Մեր ողջ եղբայրությունը աղոթում է, որ Եհովան «պատսպարող ապաստարան» լինի այս ուժգին փոթորիկներից տուժածների համար (Եսայիա 4։6)։