1993 թ. օգոստոսի 7-ին Կիևում (Ուկրաինա) 7 402 եղբայրներ և քույրեր մկրտվեցին Եհովայի վկաների «Աստվածային ուսուցում» խորագրով միջազգային համաժողովին։ Սա Եհովայի ժողովրդի ժամանակակից պատմության մեջ տեղի ունեցած ամենամեծ մկրտությունն է։ Այս ուշագրավ իրադարձությունը մնայուն հետք թողեց այդ օրը մկրտվածների կյանքում։

Մկրտվածների թվում էին Վոլոդիմիրը և նրա կինը՝ Ալլան։ Սա առաջին համաժողովն էր, որին նրանք երբևէ մասնակցել էին։ Հիշելով 16 երկրներից ժամանած մոտ 65 000 ներկաներին՝ նրանք ասում են. «Կիևում տեղի ունեցած այդ համաժողովը ցույց տվեց, որ մեր համաշխարհային եղբայրությունը իրականություն է, ոչ թե պարզապես մի բան, որի մասին կարդում ենք մեր հրատարակություններում։ Այս բոլոր տարիներին տեղի ունեցած համաժողովներին առիթ ենք ունեցել հանդիպելու է՛լ ավելի շատ հավատակիցների, ովքեր հրաշալի օրինակ են հոգևոր նպատակների ձգտելու և ուրախ լինելու հարցում»։

Օլեքսանդրը, ով Կիևից է, իր ժողովից ավելի քան 50 եղբայրների և քույրերի հետ նույնպես մկրտվել է այդ համաժողովին։ Հիշելով այնտեղի մթնոլորտը՝ նա ասում է. «Տիրող սերն ու միասնությունը ստիպեցին ինձ արտասվել։ Համոզվեցի, որ մի մեծ հոգևոր ընտանիքի մասնիկ եմ։ Համաժողովներին ներկա գտնվելը այսօր էլ է ինձ վրա նույն ազդեցությունը թողնում»։

Խորհրդածելով իր մկրտության օրվա և ամբողջ համաժողովի մասին՝ Լյուդմիլա անունով մի քույր ասում է. ««Աստվածային ուսուցում» համաժողովը օգնեց ինձ կենտրոնանալու հոգևոր նպատակներիս վրա։ Որոշեցի Եհովային լիաժամ ծառայել։ Ես հասա նպատակիս, և արդեն մոտ 28 տարի է, ինչ լիաժամ ծառայության մեջ եմ։ Այս բոլոր տարիներին Եհովան միշտ աջակցել է ինձ»։

1993 թ.-ին Կիևում տեղի ունեցած «Աստվածային ուսուցում» խորագրով միջազգային համաժողովն իսկապես հիշարժան իրադարձություն էր։ Այդ ժամանակից ի վեր՝ Ուկրաինայում քարոզիչների թիվը գրեթե եռապատկվել է։ Այսօր Եհովան շարունակում է օրհնել Ուկրաինայում ապրող այն մարդկանց, ովքեր համարձակորեն իր կողմն են կանգնում, նվիրվում են և մկրտվում (Ելք 32։26)։