2023 թ. հոկտեմբերի 20-ից մինչև նոյեմբերի 5-ը Չիլիի տարբեր քաղաքներում անցկացվեցին պանամերիկյան խաղերը։ Այս միջազգային մարզական իրադարձությանը մասնակցեցին 46 երկրներից ավելի քան 6 900 մարզիկներ՝ ներկայացնելով տարբեր սպորտաձևեր։ Խաղերի ընթացքում կազմակերպված հատուկ քարոզարշավին մասնակցեցին գրեթե 1 500 Եհովայի վկաներ։ Հրապարակային քարոզչության ցուցատախտակներ տեղադրվեցին անգլերենով, պորտուգալերենով և իսպաներենով։ Մեր հավատակիցները բազմաթիվ հետաքրքիր զրույցներ ունեցան մարզիկների և հանդիսատեսի հետ։

Մի հայտնի մարզիկ մոտեցավ գրականության ցուցատախտակին։ Նա ասաց, որ պատանեկության տարիներին մոր հետ հաճախել է ժողովի հանդիպումներին։ Թեև որպես մարզիկ նա ֆինանսական հաջողությունների էր հասել, սակայն կարիերան նրան չէր տվել այն երջանկությունն ու բավարարվածությունը, որն ակնկալում էր։ Վկաները նրա համար Աստվածաշնչից մի քանի քաջալերական մտքեր կարդացին, ինչի համար նա շատ շնորհակալ եղավ։

Մի ոստիկան, ով նույնպես երիտասարդ տարիքում հաճախել է ժողովի հանդիպումներին, մոտեցավ գրականության ցուցատախտակին։ Նա ասաց եղբայրներին, որ նրանց այնտեղ տեսնելը լավ հիշողություններ արթնացրեց իր մեջ՝ մտովի հետ գնաց այն օրեր, երբ շփվում էր ժողովի հետ։ Եղբայրն էլ նրան հայտնեց իր տարածքում գործող ժողովի և դրա հանդիպումների ժամերի մասին։ Ոստիկանը շատ ուրախացավ, երբ իրեն տվեցին Աստվածաշունչ և «Վայելիր կյանքը հավիտյան» գրքույկը։ Նա ասաց, որ շատ հաճելի էր նորից շփվել Եհովայի վկաների հետ։

19-ամյա մի աղջիկ, ցուցատախտակի մոտ զրուցելով մեր քրոջ հետ, ասաց, որ վերջերս է աղոթել, որ հասկանա Աստվածաշունչը։ Երբ մեր քույրը նրան Աստվածաշնչի ուսումնասիրություն առաջարկեց, նա ուրախությամբ համաձայնեց։ Նույն օրը՝ ավելի ուշ, քույրը սկսեց Աստվածաշունչ ուսումնասիրել այդ աղջկա հետ։ Վերջինս կանոնավորաբար ուսումնասիրում է Աստծու Խոսքը։

Խորապես երախտապարտ ենք Չիլիում ապրող մեր եղբայրներին ու քույրերին այս հատուկ նախաձեռնությանը աջակցելու համար։ Նրանց ջանքերի արդյունքը ևս մեկ ապացույց է, որ Եհովան շարունակում է օրհնել այն մարդկանց, ովքեր փնտրում են իրեն (Եսայիա 55։6)։