Ռուսաստանի Տագանրոգ քաղաքում 16 Եհովայի վկաների գործով քրեական դատավարությունը, որը արդեն 14 ամիս է՝ ընթացքի մեջ է, 2014թ. հուլիսի դրությամբ դեռ շարունակվում է։ Դատավարության ընթացքում դատարանը քննել է ավելի քան 60 հատորից բաղկացած «ապացույցներ», որոնք հիմնականում բաղկացած էին կրոնական ծառայությունների, աղոթքների և Աստվածաշնչի ընթերցանության ձայնագրություններից։ Դրանք այն նույն կրոնական ծառայություններն են, որոնք Եհովայի վկաները կատարում են ամբողջ աշխարհում։

Վտանգի տակ է ոչ միայն մեղադրյալների, այլև Տագանրոգի 800 այլ Եհովայի վկաների պաշտամունքի ազատության իրավունքը։ Բոլոր 16 մեղադրյալներն էլ իրենց վկայության մեջ նշեցին, որ անկախ գործի ելքից՝ նրանք չեն հրաժարվի իրենց հավատից և կշարունակեն իրենց պաշտամունքը՝ որպես Եհովայի վկաներ։

Տեսանյութում մեղադրյալներից մի քանիսը և նրանց փաստաբանները պատմում են այն մասին, թե ինչպես են պայքարում իրենց այդքան ցանկալի ազատությունը պաշտպանելու համար՝ չնայած անօրինական քրեական հետապնդմանը։