1. Նոյեմբերի 17, 2021

   Տոմսկ մարզի Սևերսկի քաղաքի դատարանը մեղավոր ճանաչեց Ելենա Սավելևային և նրա նկատմամբ նշանակեց չորս տարվա պայմանական ազատազրկում։ Քույրը չի կալանավորվի։ Ավելի վաղ դատախազը պահանջել էր նրա նկատմամբ նշանակել տուգանք 500 000 ռուբլու (7 198 դոլար) չափով։

2. Հուլիսի 22, 2021

   Տեղի ունեցավ առաջին դատական նիստը։

3. Մարտի 25, 2021

   Դատախազությունը քրեական գործ հարուցեց Ելենայի նկատմամբ։ Նա Ռուսաստանի Դաշնության քրեական օրենսգրքի 282.2 հոդվածով մեղադրվեց «ծայրահեղական կազմակերպության գործունեությանը մասնակցելու, դրան աջակցելու և ուրիշներին ներգրավելու մեջ»։

   Նրա դեմ ուղղված մեղադրանքները հիմնված են երկու կանանց ցուցմունքների վրա, որոնց Ելենան պատմել էր աստվածաշնչյան ճշմարտությունները։ Նրանցից մեկը ԱԴԾ գործակալ է եղել, իսկ մյուսը՝ Ռուսաստանի ազգային գվարդիայի աշխատակից։ Այս կանայք ձևացրել էին, թե հետաքրքրված են Աստվածաշնչով և գաղտնաբար ձայնագրել Ելենայի հետ իրենց խոսակցությունները։ Նրանք Ելենայի և նրա հավատակիցների մասին տեղեկությունները փոխանցել էին համապատասխան մարմիններին։

Մեզ շատ է ոգևորում Ելենայի՝ հավատարիմ մնալու վճռականությունը։ Մենք վստահ ենք, որ Եհովան հոգ է տանում բոլոր նրանց մասին, ովքեր «կողք կողքի պայքարում են բարի լուրի հավատի համար և բոլորովին չեն վախենում իրենց հակառակորդներից» (Փիլիպպեցիներ 1։27, 28)։