Վրաստանի եղբայրներն ու քույրերը ջերմ ընդունելության արժանացրին 18 երկրներից ժամանած իրենց հավատակիցներին, որոնք եկել էին՝ ներկա լինելու 2018 թ. հուլիսի 20–22-ը մայրաքաղաք Թբիլիսիում տեղի ունենալիք «Քա՛ջ եղիր» հատուկ համաժողովին։ Աստվածապետական այս միջոցառումը, որն առաջին անգամ էր անցկացվում Վրաստանում, ուշագրավ էր մատուցված հարուստ հոգևոր սնունդով և հյուրերի հանդեպ ցուցաբերված ջերմ ընդունելությամբ։ Բացի այդ, պատվիրակներին ներկայացվեց այդ երկրի հարուստ և ինքնատիպ մշակույթն ու երկարամյա պատմությունը։

Համաժողովը անցկացվեց Թբիլիսիի Օլիմպիական պալատում։ Ներկաների բարձրագույն թիվը 7 002 էր։ Ծրագիրը հեռարձակվեց ողջ երկրով՝ գրեթե 80 վայրերում, և ընդհանուր առմամբ այն լսեց 21 500-ից ավելի մարդ։ Համաժողովի ուշագրավ իրադարձություններից էր 208 նոր եղբայրների և քույրերի մկրտությունը։

Բացի հոգևոր ծրագրից՝ պատվիրակները ծանոթացան վրացական մշակույթին։ Տեղի Վկաները այցելուների համար էթնիկական պարեր և երաժշտություն կատարեցին, հյուրասիրեցին ազգային կերակրատեսակներ և շրջայցեր կազմակերպեցին հին Թբիլիսիում։

Վրաստանի մասնաճյուղի ներկայացուցիչ Թամազ Խուցիշվիլին ասում է. «Մեր երկրում ոչ միշտ ենք ունեցել կրոնի ազատություն։ Սակայն այս անգամ տեղի իշխանությունների թույլտվությամբ մենք անցկացրինք այս խաղաղ միջոցառումը։ Այսքան շատ հավատակիցների այստեղ հյուրընկալելը անմոռանալի իրադարձություն էր» (Հռոմեացիներ 15:7)։