Իր մահուան երրորդ օրը, Յիսուս յարուցուեցաւ։ Այդ նոյն օրը, ան իր հետեւորդներուն հինգ տարբեր անգամներ երեւցաւ։ Յիսուս 40 օր շարունակեց անոնց երեւնալ։ Ապա, մինչ իր աշակերտներէն ոմանք զինք կը դիտէին, ան երկինք համբարձաւ։ 10 օր ետք, Աստուած Երուսաղէմի մէջ սպասող Յիսուսի աշակերտներուն վրայ սուրբ հոգին թափեց։

Հետագային, Աստուծոյ թշնամիները պատճառ եղան որ առաքեալները բանտարկուին, բայց հրեշտակ մը ազատագրեց զանոնք։ Ստեփանոս աշակերտը հակառակորդներու կողմէ քարկոծուելով մահացաւ։ Բայց մենք կը սորվինք թէ Յիսուս ի՛նչպէս այդ հակառակորդներէն մէկը ընտրեց որպէսզի իր մասնաւոր ծառան ըլլայ եւ ան Պօղոս առաքեալը եղաւ։ Յետոյ, Յիսուսի մահէն երեքուկէս տարի ետք, Աստուած Պետրոս առաքեալը ղրկեց որպէսզի քարոզէ Հրեայ չեղող Կոռնելիոսի եւ իր ընտանիքին։

Շուրջ 13 տարի ետք, Պօղոս սկսաւ իր քարոզչական առաջին շրջապտոյտը։ Իր երկրորդ շրջապտոյտին, Տիմոթէոս միացաւ Պօղոսի։ Կը սորվինք թէ Պօղոս եւ իր ճամբորդող ընկերակիցները ի՛նչպէս Աստուծոյ ծառայելով շատ խայտալի պահեր ունեցան։ Վերջապէս, Պօղոս Հռովմի մէջ բանտարկուեցաւ։ Երկու տարի ետք, ան ազատ արձակուեցաւ, բայց յետոյ դարձեալ բանտարկուեցաւ եւ սպաննուեցաւ։ ՄԱՍ Է.–ի դէպքերը 32 տարուայ ժամանակաշրջանի մը մէջ պատահեցան։