Քանի որ մեծ նեղութիւնը կը մօտենայ, մեր քարոզչութիւնը հրատապ է (Առ. 24։11, 12, 20)։ Մարդոց օգնելու նպատակաւ, կրնանք կայքի քարտերը գործածել՝ իրենց ուշադրութիւնը դարձնելու Աստուծոյ Խօսքին եւ մեր կայքին։ Քարտը կը պարունակէ ծածկագիր մը, որ կ’ուղղէ Ինչո՞ւ Աստուածաշունչը ուսումնասիրել տեսաերիզին, ինչպէս նաեւ կը պարունակէ հրաւէր մը՝ խնդրելու աւելի տեղեկութիւն կամ Աստուածաշունչի ուսումնասիրութիւն մը։ Ոմանք հրատարակութիւն չեն ընդունիր, բայց կ’ուզեն մեր կայքը այցելել։ Այդպիսիներուն մեր կայքի քարտէն տուր. բայց չհետաքրքրուող անհատներուն՝ մի՛ տար։

Մինչ առօրեայ գործերդ կ’ընես, կրնաս մէկու մը հետաքրքրութիւնը արթնցնել պարզապէս ըսելով. «Կ’ուզեմ քեզի բան մը տալ։ Այս քարտը քեզի կ’ուղղէ կայքի մը, որ կը բովանդակէ ձրի տեղեկութիւն եւ տեսաերիզներ շատ մը նիւթերու շուրջ» (Յովհ. 4։7)։ Քանի որ կայքի քարտերը պզտիկ են, կրնաս քանի մը հատ քեզի հետ ունենալ, որ որեւէ առիթի ուրիշներուն տաս։