Otjiperi kutja Ombeibela i raisa oukahu kutja Mukuru okeri. Oyo i tu tunduuza kutja tu kurise ongamburiro yetu mu Mukuru, mokuhi nokukambura moviṋa avihe ozongamburiro mbi maze tu raere nungwari matu sokuungurisa “ozondunge” nu matu sokuṱakamisa imbi mbi ri ovisemba. (Ovaroma 12:1; 1 Johanes 5:20) Tara komapu ngu maye kongorere ko nga zikamena kOmbeibela:

•   Omuano ouye mu wa ungurwa u raisa kutja ku nOmuute. Ombeibela i tja: “Ondjuwo aihe i tungwa i omundu, nungwari Ndjambi ongu ri Ye ngwa tunga oviṋa avihe.” (Ovaheberi 3:4) Nandarire kutja epu ndo epupu okurizuva ovandu ovengi mba hongwa ve muna kutja oro epu enanḓengu tjinene. a

•   Eṱe otjovandu tu kara nonḓero yokuvanga okuzuva nawa kutja ondando yehupo oyaye, nu onḓero ndjo i kara momuinyo nandarire kutja twa yenenisa avihe mbi matu hepa mehupo. Ombeibela i tja ovandu mbe nonḓero ndjo “ovasyona mombepo,” nu ihi matji kamburire mo onḓero yokutjiwa nokurikotamena ku Mukuru. (Mateus 5:3; Omavandururiro 4:11) Ousyona mombepo kau raisa kutja Mukuru okeri uriri nungwari wina u raisa kutja eye Omuute worusuvero ngu vanga okuyenenisa ouhepe mbo.—Mateus 4:4.

•   Omaprofetero wOmbeibela ya tjangwa ozombura ozengi nḓa kapita nu ya yenenisiwa otja komahunganekero. Oukahu nowatjiri womaprofetero ngo ye raisa kutja ya za ku Mukuru omunamasaaehe.—2 Petrus 1:21.

•   Ovatjange wOmbeibela va ri nounongo wovimemwa mbwa kapitire ozondunge za imba mba hupire puna wo. Otjotjihorera, ozombura ozengi nḓa kapita ovandu ovengi aave kambura kutja ouye wa haama kombanda yotjipuka tjimuna ondjou, ombinda yomokuti poo ondwezu yongombe. Posi yokutja, Ombeibela i tja Mukuru wa “rekarekisa ehi kombanda yopoṋa pu pe ri tjo.” (Job 26:7) Momuano otjingewo Ombeibela i hungira oukahu kutja ouye “ouputuputu.” (Jesaja 40:22, King James Version) Ovandu ovengi ve muna kutja ovatjange wOmbeibela va isa ounongo wa peke mbo okuza ku Mukuru.

•   Ombeibela i zira omapuriro omengi omazeu nu owo tji ye hina okuzirwa nawa ovandu ve uta okukara noumune wokutja Mukuru keko. Otjotjihorera: Ndovazu Mukuru u norusuvero nomunamasaaehe, omena raye tji ku nouzeu nozondjito ozombi mouye? Omena raye ozongamburiro tji ze eta ouvi pendje nokueta ouwa?—Titus 1:16.