Ii, Omudiaboli omundu wakatjiri. Eye “omuhonapare wouye,” otjiutwa tjombepo ngwa ka rira omurunde nu ngwa pirukira Mukuru. (Johanes 14:30; Ovaefese 6:11, 12) Ombeibela i raisa ovikaṋena vyOmudiaboli okupitira momana nga:

•   Satan, ndi mari hee kutja “Omupirukire.”—Job 1:6.

•   Omudiaboli, ndi mari hee kutja “Omuyamburure.”—Omavandururiro 12:9.

•   Onyoka, ndja ungurisiwa mOmbeibela nu i heya kutja “Omunavineya.”—2 Ovakorinte 11:3.

•   Omurore.—Mateus 4:3, EEP.

•   Omunavizeze.—Johanes 8:44.

Omudiaboli kaurunde mbu ri mweṱe

 Ovandu tjiva ve mune kutja Satan Omudiaboli, ourunde mbu ri mweṱe. Posi yokutja, Ombeibela i nehungi ndaari pokati ka Mukuru na Satan. Mukuru ohomonena, ku nao eye kamaa yenene okuhungira ku norupa orunaurunde mu ye omuini. (Deuteronomium 32:4; Job 2:1-6) Momuano tjingewo, Satan wa rora Jesus ngu hi na wa ri nouvi. (Mateus 4:8-10; 1 Johanes 3:5) Nu Ombeibela i raisa kutja Omudiaboli omundu wakatjiri nu katjikaṋena tjourunde tji tji ri mweṱe.

 Hapo matu sokutemwa kutja ovandu ovengi kave kambura kutja Omudiaboli omundu wakatjiri? Kako katjiperi. Ombeibela i hungira kutja Satan u ungurisa ovizeze okuyenenisa ozondando ze. (2 Ovatesalonika 2:9, 10) Otjizeze tjimwe otjinene okuṱizira ovandu ovengi monḓorera kutja ave ha tjiwa kutja oke ri.—2 Ovakorinte 4:4.

 Ouatjiri: Embo rOtjiheberi mOzombeibela tjiva nda torokwa kutja “Lucifer” ri heya kutja “ongeṋangeṋe.” (Jesaja 14:12) Omatjangwa ye raisa kutja embo ndi Lucifer ri hungirira kozombara Mukuru nḓu ma kanyona mena romeritongamisiro. (Jesaja 14:4, 13-20) Embo ndi “ongeṋangeṋe” ra ungurisiwa okunyekerera ozombara za Babilon kombunda yaindu tji za zu nokunyonwa.

 Ouatjiri: Omudiaboli omunavita na Mukuru, nu kamukarere we. Satan Omudiaboli u pirukira nokukuminina ovakarere va Mukuru.—1 Petrus 5:8; Omavandururiro 12:10.