Ii. Mukuru u rikendera kovakarere ve mba vera. Ohunga nomukarere omuṱakame, Ombeibela i tja: ‘Muhona me mu vatere tja vere, nu me mu verukisa.’ (Epsalme 41:3) Tji u hupa nomutjise mbu ha veruka, omapu yetatu ngu maye kongorere mba maye kuvatere okutjinda omutjise mbo:

1.   Kumba kutja u kare nomasa okutjinda omutjise mbo. Ove mo yenene okumuna ‘ohange ya Ndjambi ndja kapita ozondunge azehe zovandu,’ ndji mai yenene okukupa omasa nandarire kehi yomauzeu.—Ovafilipi 4:6, 7.

2.   Kara nohange momuinyo. Ombeibela i tja: “Okukara nondjoroka ku eta omberukiro. Okukara nondjenda ku ngundiparisa orutu.” (Omiano 17:22) Kara nondjoroka momuinyo, mena rokutja okutjita nao ka kukuvatere moruveze rouzeu uriri nungwari wina kuku etera omberukiro.

3.   Kara nongamburiro momaundjiro woruyaveze. Okukara nomaundjiro kutjita kutja u kare nondjoroka nandarire kehi youvere ouzeu. (Ovaroma 12:12) Ombeibela i tja: “Kape nomundu ngwa tura mehi retu, ngu ma unauna rukwao kutja eye wa vera.” (Jesaja 33:24) Mukuru ma kaisapo omitjise avihe mbi ha yenene okuverurwa ndino. Otjotjihorera, Ombeibela ya kahurura kutja indu omundu tja kurupa: “Indino orutu rwe maru rire oromutanda norunamasa rukwao.”—Job 33:25.

 Yandja ombango ku imbi: Nandarire kutja tu hepa ombatero ya Mukuru, Ovahongonone va Jehova wina ve paha ombatero okuza kozonganga indu tji ve ri kehi youvere. (Markus 2:17) Katu twapo omirari kaaṋi vyomapangero nungwari tu muna kutja omundu auhe ma sokuritoororera omuini omapangero ngu ma vanga.