Mukuru kangu eta omaumba nge tjitwa ndino, posi ya u nakonatja novandu mbe ṱunwa i yomaumba otja ingo. Ouhona wa Mukuru mau yandisa oviṋa mbi tjita kutja tu mune omauzeu tjimuna omaumba. Posi ya ngunda ouhona au hi ye ya Mukuru u huhumiṋa imba mba ṱunwa i yomaumba.—2 Ovakorinte 1:3.

•  Matu yenene vi okutjiwa kutja omaumba ngu tu muna kamberero okuza ku Mukuru?

•  Hapo omaumba ngu tu muna otjiraisiro tjokutja tu hupa momayuva omasenina?

•  Omomuano uṋe Mukuru me vatera imba mba ṱunwa i yomaumba?

•  Hapo omirari vyOmbeibela mavi yenene okutuvatera okurirongerisa komurungu woruveze komaumba?

•  Omatjangwa wOmbeibela ngu maye huhumiṋe imba mba wirwa i yomaumba

 Ombeibela i tja povikando tjiva Jehova aa ungurisa oviwonga okueta omberero kovandu. Posi ya, omuano Jehova ma ungurisa oviwonga wa panguka tjinene komaumba nge tjitwa ndino.

•   Omaumba ye zepa nu ye eta onyoneno kovandu avehe. Mukuru aa ungurisa oviwonga okuvera imba ovarunde uriri. Otjotjihorera, indu Mukuru tja nyona ovihuro mbi Sodom na Gomora, eye wa yama omurumendu omusemba Lot novanatje ve ovakazona vevari. (Genesis 19:29, 30) Mukuru u tjiwa omitima vyovandu, ku nao eye aa nyono imba ovarunde uriri.—Genesis 18:23-32; 1 Samuel 16:7.

•   Omaumba ye wira ovandu nokuhinokuundjira ko. Posi ya, indu Mukuru tja vere ovarunde noviwonga, ee ve tjivisa komurungu woruveze. Nu imba mba puratene komarakiza we aave yamwa.—Genesis 7:1-5; Mateus 24:38, 39.

•   Oviṋa ovandu mbi ve tjita ombi tjita kutja pe kare omaumba. Omomuano uṋe? Omokunyona ehi nokukatunga potuveze pu mape ya ape kara omanyinganyingiro wehi, omipupo nomaumba warwe. (Omavandururiro 11:18) Katu sokuyandja ondjo ku Mukuru mena romaumba nge etwa i yomikambo omivi vyovandu.—Omiano 19:3.

 Otjingaperi, Ombeibela ya hunganeka kutja maku kara omaumba ‘komaandero wouye mbwi,’ poo “momayuva omasenina.” (Mateus 24:3; 2 Timoteus 3:1) Otjotjihorera, ohunga noruveze rwetu, Jesus wa tja: “Koṋa akuhe maku kara ondjara nomanyinganyingiro wehi.” (Mateus 24:7) Moruveze rwatjimanga Mukuru ma kaisa po oviṋa mbi eta omihihamo nomauzeu, mu mamu kamburire mo omaumba.—Omavandururiro 21:3, 4.

•   Mukuru u huhumiṋa imba mba ṱunwa i yomaumba nEmbo re Ombeibela. Ombeibela i tu raera kutja Mukuru u rikendera kweṱe nu u tjiwa omihihamo mbi tu muna. (Ovapangure 10:16; 1 Petrus 5:6, 7) Oyo wina i tu raera omakwizikiro we indu omaumba tji ye hi nokukakara ko rukwao.—Tara kokawongo nga “ Omatjangwa wOmbeibela ngu maye vatere imba mba ṱunwa i yomaumba.”

•   Mukuru u vatera imba mba ṱunwa i yomaumba okupitira movakarere ve. Mukuru u ungurisa ovakarere ve kombanda yehi mbe horera ku Jesus. Ombeibela ya hunganeka kutja Jesus ma huhumiṋa “imba mba nyaika omitima” na imba “avehe mbe noruhoze.” (Jesaja 61:1, 2) Ovakarere va Mukuru wina ve kondja okutjita nao.—Johanes 13:15.

   Mukuru wina u ungurisa ovakarere ve okuyandja ombatero yoviṋa mbi mavi hepwa ku imba mba ṱunwa i yomaumba.—Oviungura 11:28-30; Ovagalate 6:10.

 Otjingaperi, nandarire kutja Ombeibela kai tjangerwe nondando yokuturongerisa komaumba, mu yo mu nomirari mbi mavi yenene okutuvatera. Otjotjihorera:

•   Rirongerisa komurungu woruveze kutja mo tjiti vi okurirongerisa komaumba. Ombeibela mai tja: “Omunazondunge u muna oumba tji mau ya na ṱara.” (Omiano 22:3) Ma rire nawa okutya komurungu woruveze kutja mamu tjiti vi ngunda omaumba aye hi ya tjitwa. Omarongerisiro otja inga maye kamburire mo okukara noviṋa ovinanḓengu mbi mamu hepa, noruveze ndu mamu woronganene po otja eṱunḓu indu tji pa tjitwa oumba.

•   Omuinyo omunanḓengu pomauini. Ombeibela mai tja: “Eṱe katu notjiṋa tji twa eta mouye! Nu wina katu notjiṋa tji matu twaerere tji matu zu mo mouye!” (1 Timoteus 6:7, 8) Indu tji pa tjitwa omaumba, matu sokukara noupaturuke wokuisa ozondjuwo zetu nomauini wetu. Matu sokuzemburuka kutja omuinyo omunanḓengu tjinene okukapita omauini.—Mateus 6:25.