Nandarire kutja omundu mape ya a munu kutja eye u nousemba okutoora ongore, okutjita nao maku pirukire omurari wOmbeibela mbu mau tja: “O ha tja nai: ‘Ami me tjiti ku ye otja eye tja tjiti ku ami! Me sutisa omundu auhe otja kozondjito ze.’” (Omiano 24:29) Ombeibela i nomaronga nga vatera ovandu ovengi okuisa okuvanga okutoora ongore.

Morupa ndwi

•  Ongwaye tje ri otjiṋa otjivi okukara nongore?

•  Omomuano uṋe Mukuru me yandja omavyuriro?

•  Me yenene vi okunakaura onḓero yokukara nongore?

•  Omazuviro woposyo ohunga nongore

 Indu omundu tje ku hihamisa, mape ya o pindike nokuvanga kutja omundu ngo ma mune omberero ku imbi mbya tjiti kove. Posi yokutja, okukara nongore ku pirukira imbi Ombeibela mbi honga. Omena raye?

 Mukuru ka tjaterwa indu ovandu tji mave tjiti ongore ku varwe. MOmbeibela Jehova a Mukuru u tja: “Ongore oyandje, owAmi ngu me sutisa.” (Ovaroma 12:19) Ombeibela i tunduuza imba mba tjindwa momiano omuvi okupaha omiano okuzengurura otjiṋa ho momuano wohange pendje nokutoora ongore. (Ovaroma 12:18) Posi ya, omunda ma yenene okutjita vi indu tji pe hi nomuano warwe wokuzengurura otjiṋa hi momuano wohange? Omatjangwa ye tunduuza kutja tu kare nongamburiro kutja Jehova ma ṱunu ouhasemba auhe.—Epsalme 42:10, 11.

 Mukuru nai u yandjera ozohoromende okuvyura ovandu mba tjiti ouvi. (Ovaroma 13:1-4) Moruyaveze ma eta ousemba kovandu avehe nu ma isa po omauzeu nga aruhe.—Jesaja 11:4.

•   Isa okutjita otjiṋa mena rokutja wa pindike. (Omiano 17:27) Ovandu mbe tjita oviṋa mena romazenge, kombunda ve kafula navi mena roviṋa ovivi mbi va tjiti. Posi ya imba mbe ripura, owo ve yenena okutoora omikambo omisemba.—Omiano 29:11.

•   Tjiwa ouatjiri auhe. (Omiano 18:13) Omundu ngwa tjitwa otjiṋa otjivi ma yenene okuripura omuini omapuriro nga, ‘Pe nomapu ngu mbi hi nokutjiwa ngu maye raisa kutja omena raye omundu ngo tja tjiti nao? Eye u ri kehi yombameno? Poo wa tjiti otjiṋa ho nokuhinokuripurira ko?’ Povikando tjiva, mape ya ape munika tjimuna omundu ngo wa tjiti otjiṋa ho owina okutuhihamisa, posi ya tjiri eye wa tjiti ondataiziro.

 Omazuviro woposyo: Mena rokutja Ombeibela kai tu yandjere okutoora ongore, ku nao katu sere okutjita otjiṋa indu tji twa tjindwa navi.

 Ouatjiri: Indu omundu tja tjindwa navi u nousemba okuritjevera omuini poo okupaha ombatero kouhonapare. Posi ya, Ombeibela i tja tu sokuisa ovirwa otja pu matu yenene.—Omiano 17:14.