MOmbeibela, embo nda torokwa otja “ombendukiro” ra za kembo rOtjigrike ndi anastasis, ndi mari hee “okuyeruruka” poo “okusekama rukwao.” Omundu ngwa munu ombendukiro u pendurwa motjovakoke na kara nomuinyo rukwao, otja tja ri ngunda e hi ya ṱa.—1 Ovakorinte 15:12, 13.

 Nandarire kutja embo ndi “ombendukiro” kari ri mOmatjangwa wOtjiheberi, potuingi nge isanewa Etestamente Ekuru, oyo ye hungira ohunga nomakwizikiro wombendukiro. Otjotjihorera, Ombeibela ya kwizika kutja: “Muhona opunga ama kotora omiinyo vyaimba mba koka rukuru.”—Hosea 13:14; Job 14:13-15; Jesaja 26:19; Daniel 12:2, 13.

 Ovandu mave kapendurwa pi? Ovandu tjiva ve pendurwa okukahupa meyuru okukahonapara otjozombara pu na Kristus. (2 Ovakorinte 5:1; Omavandururiro 5:9, 10) Ombeibela i tja ombendukiro ndjo ‘ombendukiro ondenga yovakoke.’ Ihi matji hee kutja mape kara nombendukiro yarwe. (Omavandururiro 20:6) Ombendukiro ndji oyokukahupa kombanda yehi, nu ovandu ovengi mave kamuna ombendukiro ndji.—Epsalme 37:29.

 Ovandu mave kapendurwa momuano uṋe? Mukuru wa yandja omasa ku Jesus okupendura ovakoke. (Johanes 11:25) Jesus ma kapendura “ovaṱi avehe [mbe ri mourizemburuka wa Mukuru, NWT]” nu owo mave kotoka tjimuna tji va ri, novikaṋena mbi va ri na vyo ngunda ave hi ya ṱa. (Johanes 5:28, 29) Tjiva mave kapendurwa okuyenda keyuru motutu twombepo, ngunda varwe amave pendurwa okuhupa kombanda yehi motutu twonyama otuveruke.—Jesaja 33:24; 35:5, 6; 1 Ovakorinte 15:42-44, 50.

 Oouṋe mbu mave kapendurwa? Ombeibela i tja: “Ovandu avehe ovawa novavi mave penduka movakoke.” (Oviungura 24:15) Ovandu ovawa, ovandu ovaṱakame tjimuna Noa, Sara, na Abraham. (Genesis 6:9; Ovaheberi 11:11; Jakobus 2:21) Ovandu ovavi owomba mbe ha karere nonḓuviro ku Mukuru, mena rokutja kave munine oruveze okumutjiwa.

 Posi yokutja, ovandu tjiva ve tjita oviṋa ovivi tjinene nokuhinokurundurura ongaro yawo. Nu owo tji va ṱu, kave nokukamuna ombendukiro oparukaze.—Mateus 23:33; Ovaheberi 10:26, 27.

 Ombendukiro mai katjitwa ruṋe? Ombeibela ya hunganeka kutja ombendukiro yokukahupa meyuru mai utu moruveze rwa Kristus ndwa uta mo-1914. (1 Ovakorinte 15:21-23) Ombendukiro yokukahupa kombanda yehi mai katjitwa mOzombura Eyovi zOuhonapare wa Jesus Kristus, indu ehi tji mari karira oparadisa.—Lukas 23:43; Omavandururiro 20:6, 12, 13.

 Omena raye tji mo yenene okukara nongamburiro mombendukiro? Ombeibela i tu raera ohunga nombendukiro yovandu muvyu, nu otjikando atjihe pa ri ovandu mbaave tarere. (1 Ozombara 17:17-24; 2 Ozombara 4:32-37; 13:20, 21; Lukas 7:11-17; 8:40-56; Johanes 11:38-44; Oviungura 9:36-42; 20:7-12; 1 Ovakorinte 15:3-6) Otjotjihorera, Jesus wa pendura Lasarus kombunda yomayuva yane indu tja za nokuṱa, nu Jesus wa tjita nao komurungu wovandu ovengi. (Johanes 11:39, 42) Nandarire imba mba tondere Jesus kaave yenene okupataṋa otjiṋa ho. Ku nao, owo aave vanga okuzepa Jesus na Lasarus.—Johanes 11:47, 53; 12:9-11.

 Ombeibela i raisa kutja Mukuru u nomasa nonḓero okupendura ovakoke. Eye u zemburuka oviṋa avihe ohunga nomundu auhe eye ngu ma kapendura nomasa we. (Job 37:23; Mateus 10:30; Lukas 20:37, 38) Mukuru ma yenene okupendura imba mba ṱa, nu eye u nonḓero okutjita nao. Ombeibela i tja nai ohunga na Mukuru indu tji mai hungire ohunga nombendukiro: ‘Ove mo kara nenyando mu ami, ngu mbi ri omuutwa woye.’—Job 14:15.

Oumune woposyo ohunga nombendukiro

 Omazuviro woposyo: Ombendukiro omahakaeneno womuinyo ku norutu.

 Ouatjiri: Ombeibela i honga kutja indu omundu tja ṱu ka kara po rukwao, nu kape notjiṋa tji tji hupa peke kombunda yonḓiro. (Genesis 2:7; Omuzuvarise 9:5, 10) Ku nao, indu omundu tji ma kapendurwa, Mukuru me kemuungura koupe.

 Omazuviro woposyo: Ovandu tjiva mave kapendurwa, nu okuzambo ave nyonwa hakahana.

 Ouatjiri: Ovaroma 6:7 ri tja: “Omundu tja ṱu, eye wa kuturwa komasa wouvi.” Imba mbu mave kara nonḓuviro koviṋa mbi mave rihongo kombunda yombendukiro, omana wawo maye tjangwa ‘membo romuinyo.’—Omavandururiro 20:12, 13.

 Omazuviro woposyo: Indu omundu tja pendurwa, eye ma kara norutu rwe ndwa ri na rwo ngunda e hi ya ṱa.

 Ouatjiri: Kombunda yonḓiro, orutu rwomundu ru wora naru yaruka koruuma.—Omuzuvarise 3:19, 20.