Ombepo ondjapuke omasa wa Mukuru nge ungurisa. (Mika 3:8; Lukas 1:35) Mukuru u ungurisa ombepo ye ondjapuke otja omasa we okuyenenisa ombango ye.—Epsalme 104:30; 139:7.

 MOmbeibela embo ndi ‘Ombepo’ ra za kembo rOtjiheberi ndi ruʹach na indi rOtjigrike pneuʹma. Potuingi omambo ngo ye heya omasa wa Mukuru poo ombepo ndjapuke. (Genesis 1:2) Nungwari Ombeibela i ungurisa omambo ngo momuano warwe:

•   Okusuvana.—Habakuk 2:19; Omavandururiro 13:15.

•   Ombepo.—Genesis 8:1; Johanes 3:8.

•   omuinyo mbu ri moviṋa mbi nomuinyo.—Job 34:14, 15.

•   Ongaro yomundu ndji ma raisa.—Numeri 14:24.

•   Ovandu wombepo mbe kamburira mo Mukuru novaengeli.—1 Ozombara 22:21; Johanes 4:24.

 Oviṋa avihe mbi, ka vi munika kovandu posi yokutja oviungura vyavyo ombi munika kovandu. Momuano otjingewo ombepo ya Mukuru, “ndji ri tjimuna ombepo kai munuka, nu oyo onamasa.”—An Expository Dictionary of New Testament Words, by W. E. Vine.

 Ombeibela wina i sasaneka ombepo ondjapuke ya Mukuru ‘komake’ poo ‘kominue’ vye. (Epsalme 8:3; 19:1; Lukas 11:20; sasaneka Mateus 12:28.) Tjimuna omuungure woviṋa tje ungurisa omake nominwe vye okuungura oviungura vye, Mukuru wa ungurisa ombepo ye okuyenenisa oviṋa mbi mavi kongorere kehi mba:

•   Eyuru nehi.—Epsalme 33:6; Jesaja 66:1, 2.

•   Ombeibela.—2 Petrus 1:20, 21.

•   Ovihimise mbya tjitwa i yovakarere ve woruveze orukuru nokuzuvarisa noupatje.—Lukas 4:18; Oviungura 1:8; 1 Ovakorinte 12:4-11.

•   Ongaro ombwa ndja raisiwa i yovandu mba ri nonḓuviro kuye.—Ovagalate 5:22, 23.

Ombepo ondjapuke kamundu

 Mokusasaneka ombepo ya Mukuru ku ‘nomake,’ ‘ominwe,’ poo ‘okusuvana,’ Ombeibela i raisa kutja ombepo ondjapuke kamundu. (Eksodus 15:8, 10) Omake womuungure woviṋa kaye yenene okuungura oyeni nokuhina ombango yomundu omuini, momuano otjingewo ombepo ondjapuke ya Mukuru i ungura otja kombango ye. (Lukas 11:13) Ombeibela wina i sasaneka ombepo ya Mukuru komeva na koviṋa tjimuna ongamburiro nounongo. Omasasanekero ngo aehe maye raisa kutja ombepo ondjapuke kamundu.—Jesaja 44:3; Oviungura 6:5; 2 Ovakorinte 6:6.

 Ombeibela i tamuna omana wa Jehova Mukuru nOmuna we, Jesus Kristus posi yokutja oyo kai tamunune ena rombepo ondjapuke. (Jesaja 42:8; Lukas 1:31) Indu Omukriste Stefanus tja muna otjirimunikise tjomeyuru eye wa muna ovandu vevari nungwari kamunine vetatu. Ombeibela i tja: “Ingwi Stefanus, ngwe urire nOmbepo Ondjapuke, wa tara keyuru a munu ongeṋangeṋeno ya Ndjambi na Jesus a kurama kokunene kwa Ndjambi.” (Oviungura 7:55) Ya ri omasa wa Mukuru ngaa ye ungura nu nga tjita kutja Stefanus ma mune otjirimunikise ho.

 Omazuviro woposyo: “Ombepo ondjapuke,” omundu, nu oyo orupa roviṋa vetatu mumwe, otja tji patjangwa mu 1 Johanes 5:7, 8 mOmbeibela ndji o King James version.

 Owatjiri: Mu 1 Johanes 5:7, 8 mOmbeibela ndji King James version mu nomambo nga “meyuru, Ihe, Embo, nOmbepo Ondjapuke: nu oviṋa vitatu mbi i vimwe. Nu pe novetatu mbe hongonona mouye.” Posi yokutja ovakonḓonone va muna kutja omambo ngo kaye tjangerwe i yomuapostle Johanes nu kaye sokukara mOmbeibela. Professor Bruce M. Metzger wa tjanga kutja: “Omambo ngo kawatjiri nu kaye nousemba okukara meTestamente epe.”—A Textual Commentary on the Greek New Testament.

 Omazuviro woposyo: Ombeibela i hungira ohunga nombepo ondjapuke otjomundu, nu iho tji raisa kutja omundu.

 Owatjiri: Omatjangwa povikando tjiva ye hungira ohunga nombepo ondjapuke otjomundu, posi yokutja iho katji hee kutja ombepo ondjuke omundu. Ombeibela wina i hungira tjimuna ounongo, onḓiro, nouvi ovandu. (Omiano 1:20; Ovaroma 5:17, 21) Otjotjihorera, ounongo kuza u ‘noviungura’ ‘novanatje,’ nu ouvi kuza u pukisa ovandu, u zepa nu u wovisa.—Mateus 11:19; Lukas 7:35 EEP; Ovaroma 7:8, 11.

 Momuano otjingewo, indu omuapostele Johanes tja hungira omambo wa Jesus, eye wa hungira tjimuna ombepo ondjapuke omundu indu tja tja, “omuvyonge” poo omuvatere ngu ma raisa owatjiri, ngu ma hongora, ngu ma hungire, ngu ma zuu, ngu ma tjivisa, ngu ma hivirike nokuyakura. Wa ungurisa embo ndi “eye” tjaa hungire ohunga ‘nomuvyonge’ poo omuvatere. (Johanes 16:7-15) Nungwari embo ndi ‘Omuvyonge’ poo omuvatere mOtjingrike ndi ri (pa·raʹkle·tos) ri ungurisiwa kotjiṋa otjirume otja komutjangahingo weraka rOtjingrike. Indu Johanes tja hungira ohunga nombepo ondjapuke wa ungurisa embo ndi “oyo” ndi hina okuhungira ohunga nourume poo oukaze.—Johanes 14:16, 17.

 Omazuviro woposyo: Okupapitisiwa mena rombepo ondjapuke ku raisa kutja ombepo ondjapuke omundu.

 Owatjiri: Ombeibela i ungurisa embo ndi “mena” okuyandja omasa poo ousemba. (Deuteronomium 18:5, 19-22; Ester 8:10) Nu ihi tji ri tjimuna omambo wOtjiingirisa nge tja “mena roveta,” nu omambo ngo kaye hee kutja oveta omundu. Omundu ngwa papitisiwa ‘mena rombepo ondjapuke’ u tjiwa kutja omasa noviungura vyombepo ondjapuke ombi mavi mu vatere okuyenenisa ombango ya Mukuru.—Mateus 28:19.

 Omazuviro woposyo: Ovapostele va Jesus novahongewa ve varwe aave kambura kutja ombepo ondjapuke omundu.

 Owatjiri: Ombeibela kaitja nao nu nandarire omakuruhungi. O Encyclopædia Britannica i tja: “Omaheya wokutja ombepo ondjapuke omundu wapeke . . . yaza mu Constantinople mombura ndji O Z 381.” Oyo ya ri ozombura zokombanda 250 kombunda ya indu omuapostele omusenina tja koka.