Ovitjitwa, ozonḓero, poo omeripura ngamwa nge pirukira omirari vya Mukuru, avihe mbi vi kamburira mo ouvi. Owo wina u kamburira mo okuteya omatwako wa Mukuru mokutjita oviṋa ovivi, poo ovihasemba, komurungu wa Mukuru. (1 Johanes 3:4; 5:17) Ombeibela wina i hungirira kouvi wokuhinokutjita otjiṋa otjisemba indu tji matu sokutjitjita.—Jakobus 4:17.

 Omaraka Ombeibela mu ya tjangerwe, embo ndi ouvi ri heya “okuparwisa otjiṋa.” Otjotjihorera, otjimbumba tjovarwe vOvaisrael otjikuru aatji tjiwa okuyumba omawe nawa nongarena “nokuhinokuparwisa.” Omambo nga tji ya torokwa ongarate maye hee kutja “nokuhinokutjita ouvi.” (Ovapangure 20:16) Ku nao, okutjita ouvi okuparwisa okuṱakamisa omirari vya Mukuru omisemba.

 OtjOmuute, Mukuru u nousemba wokuyandja omirari kovandu. (Omavandururiro 4:11) Eṱe tu nomerizirira komurungu we kovitjitwa vyetu.—Ovaroma 14:12.

Hapo matu yenene okuyepa ouvi oparukaze?

 Kako. Ombeibela i tja: “Avehe va tura ondjo, nu va humburuka kokure na Ndjambi.” (Ovaroma 3:23; 1 Ozombara 8:46; Omuzuvarise 7:20; 1 Johanes 1:8) Omena raye?

 Ovandu ovatenga, Adam na Eva, kava ri nouvi pomautiro, mena rokutja owo va memenwe kosaneno ya Ndjambi nu va ri ohomonena. (Genesis 1:27) Nungwari, owo kave karere nonḓuviro ku Mukuru, ku nao kava ri ohomonena rukwao. (Genesis 3:5, 6, 17-19) Indu tji va kakara novanatje, owo kava ri ohomonena, mena rokutja va rumata ouvi okuza ku wo. (Ovaroma 5:12) Ombara David wa Israel opa zokutja: “Ami owami omunauvi okuza kongwatero yandje.”—Epsalme 51:5.

Hapo ouvi tjiva wa kapita oukwao?

 Ii. Otjotjihorera, Ombeibela i tja, ovarumendu va Sodom otjikuru va ri “ovavi novarunde tjinene,” nu ouvi wawo wa ri “ounene tjinene.” (Genesis 13:13; 18:20) Tara komapu yetatu ngu maye raisa kutja ouvi ounene pu pe ṱeki pi.

1.   Ounene poo ondondo youvi. Ombeibela i tu rakiza okuyepa omauvi omanene tjimuna oruvakiro, okurikotamena koomukuru vovisenginina, okuvaka, okuṱomeva wamururu, okupunda oviṋa vyovandu, okuzepa, noundjai. (1 Ovakorinte 6:9-11; Omavandururiro 21:8) Ombeibela wina i hungirira kouvi mbu tu tjita nokuhinokuripura poo mbu tu ha tjitire owina, tjimuna oviṋa mbi matu hungire poo ovitjitwa mbi mavi hihamisa varwe. (Omiano 12:18; Ovaefese 4:31, 32) Posi yokutja, Ombeibela i tu tunduuza okuhinokuṱikonaparisa ouvi ngamwa, mena rokutja owo mau yenene okutjita kutja tu ka tjite ouvi ounene tjinene.—Mateus 5:27, 28.

2.   Epu rokutjita otjiṋa. Ovandu tjiva ve tjita ouvi mena rokutja kave nokutjiwa kutja Mukuru undjira ko tjike ku wo. (Oviungura 17:30; 1 Timoteus 1:13) Ombeibela kai yandja ombitira po komauvi otja ingo, posi yokutja i twa po ombangu pokati komauvi ngo na inga nge tjitirwa wina okuteya omatwako wa Mukuru. (Numeri 15:30, 31) Ovandu mbe tjitira ouvi owina ‘ovarunde.’—Jeremia 16:12.

3.   Ovikando ouvi mu wa tjitwa. Ombeibela wina i twa po ombangu pokati kouvi mbwa tjitwa otjikando tjimwe, na imbwi mbwa tjitwa ovikando ovingi. (1 Johanes 3:4-8) Imba mbe ‘panḓera pokutjitira wina ouvi,’ nandarire kombunda yokurihonga okutjita imbi mbi ri oviwa, mave kamunikwa ondjo komurungu wa Mukuru.—Ovaheberi 10:26, 27.

 Imba mba tjita ouvi ounene ve rimuna ondjo mena rozondataiziro zawo. Otjotjihorera, Ombara David wa tja: ‘Ami mba ṱomwina momupupo womauvi wandje; ya karira otja omutwaro omuzeu kwami okuutjinda.’ (Epsalme 38:4) Posi yokutja Ombeibela i yandja omaundjiro nga: “Omurunde nga ise ozondjito ze ozombi nomeripuriro we omavi. Nga tanauke ku Muhona, Ndjambi wetu; Eye omunatjari nu wa tumba ondjesiro.”—Jesaja 55:7.