Omuapostele Paulus wa tjanga kutja: “Ami mbi vanga okutjita ouwa, nungwari ihi porwatjo tji mbi tjita owo mbwi ouvi.” (Ovaroma 7:21) Hapo wa rora okurimuna mongaro ndji? Tji pe ri nao, orupa ndwi maru yenene okukuvatera okupirukira omarorero wokutjita ouvi.

•  Oviṋa mbi mo hepa okutjiwa

•  Oviṋa mbi mo yenene okutjita

•  Ovakweṋu ve tja vi?

 Popengi varwe ve tu ṋiṋikiza okutjita ouvi. Ombeibela i tja “Otjikaro tjovandu ovavi tji zunḓa omihingo omiwa.” (1 Ovakorinte 15:33) Oṋiṋikizire okuza ku varwe poo okuza motungovi, mape ya ai sekamisa ozonḓuma momutima woye nḓu maze katjita kutja u rorwe okutjita ouvi. Ku nao mape ya aze katjita kutja u rikute ku ‘nouingi wovandu okukatjita oviṋa ovihasemba.’—Eksodus 23:2.

 “Oṋiṋikizire yokuvanga okuyakurwa i varwe mape ya ai tjiti kutja u tjite oviṋa mbi mave tjiti kutja ve ku yakure.”—Jeremy.

 Ripurira ku imbi: Ongwaye tji mai rire ouzeu okupirukira omarorero indu tji tu rikenda tjinene kutja varwe ve noumune ouṋe ohunga na eṱe?—Omiano 29:25.

 Epu enanḓengu: O yandjere oṋiṋikizire okuza ku varwe i tjite kutja u nakaure ongaro yoye ombwa yomeritjindiro.

 Tjiwa nawa oviṋa mbi u kambura mo. Tji u hi nokutjiwa nawa oviṋa mbi u kambura mo, varwe mave ku tyere po. Mai rire nawa tji wa kongorere erakiza rOmbeibela ndi: “Roreye oviṋa avihe nu mu ṱakamise ihi tji tji ri otjiwa.” (1 Ovatesalonika 5:21) Tji wa zuu nawa oviṋa mbi u kambura mo, mai rire oupupu okuviṱakamisa, nokupirukira omarorero ngu mo munu.

 Ripurira ku imbi: Ongwaye tji u muna kutja omirari vya Mukuru vyomeritjindiro vi ku etera ouwa?

 “Mba muna kutja indu tji mba ṱakama moviṋa mbi mbi kambura mo nokupirukira omarorero, varwe ve raisa ondengero kwami tjinene.”—Kimberly.

 Otjihorera otjiwa okuza kOmbeibela: Daniel. Ngunda ee ri omutanda Daniel ‘we rimanena’ omuini kutja eye ma puratene komatwako wa Mukuru.—Daniel 1:8.

 Tjiwa oungundipare woye. Ombeibela i hungira ohunga ‘nozonḓuma zoumutanda.’ (2 Timoteus 2:22) Ozo ozonḓero nḓe kara nomasa tjinenenene indu tji u ri omutanda. Ozonḓuma nḓa kaze nokukamburira mo onḓero yokuvanga okuhakaena monyama uriri, posi ya wina maze kamburire mo onḓero yokuvanga okuyakurwa i varwe, onḓero yokuvanga okupita ponganda kutja u ke rikarere kove omuini, nonḓero yokuvanga okutjita ozondando zoye omuini ngunda au ri kehi yozombura, poo ngunda au hupa kehi yovanene voye.

 Ripurira ku imbi: Ombeibela mai tja: “Omundu u rorwa, indu tji ma twarwa na hemenwa i ozonḓuma ze omuini zourunde.” (Jakobus 1:14) Ozonḓuma zeṋe nḓe ku rora tjinene?

 “Hungira ouatjiri kutja omarorero yeṋe ngu kondja na wo, tjita omakonḓononeno kutja mo yenene vi okurwisa omarorero ngo, nu tjanga omapu ngu maye ku vatere, nu otjikando tjarwe tji wa hungamwa i yomarorero ngo ove mo tjiwa kutja mo yenene vi okuyerwisa.”—Sylvia.

 Otjihorera otjiwa okuza mOmbeibela: David. Povikando tjiva David aa tjiti imbi varwe mbyaave mu ṋiṋikiza okutjita, nu aa puratene kozonḓero ze omuini. Posi ya David we rihongera kozondataiziro ze, nu aa kondja okutjita ouwa. Eye wa kumba ku Jehova na tja: “Omutima omukohoke ungura mu ami, Ndjambi, nu u zikamise ombepo ombe nonḓikame moukoto wandje.”—Epsalme 51:10.

 Toora omukambo. Ombeibela i tja: “Ouvi au he ku uru.” (Ovaroma 12:21) Ihi matji hee kutja mo yenene okuyepa omarorero. Ove mo yenene okutoorora okutjita oviṋa imbi oviwa.

 Ripurira ku imbi: Omomuano uṋe mu mo yenene okutoora omukambo mokutjita ouwa, indu tji mo rorwa okutjita ouvi?

 “Ami mbi ripura nomuano mu mape ya e fula indu tji mba zu nokutjita otjiṋa tji mba rorwa na tjo. Hapo mape ya e fula nawa? Ngahino, posi ya oiri ndjo uriri. Hapo mape ya e kafula nawa ohunga nomukambo mbwi otja oruveze tji maru kayenda? Kako, me kafula navi tjinene. Hapo okutjita nao tjiri maku ndji vatera? Kako.”—Sophia

 Otjihorera otjiwa okuza mOmbeibela: Paulus. Nandarire kutja Paulus wa tja aa kondjo nomeripura omavi, eye aa kondjo okutjita ouwa. Eye wa tja: “Ami mbi tona orutu rwandje ru tindire, nu mbi ru ete kehi youkarere.”—1 Ovakorinte 9:27.

 Epu enanḓengu: Indu tji mo rorwa ove u nousemba wokutya kutja mo toora omukambo uṋe.

 Zemburuka kutja omarorero kaye karerere. Melissa wozombura 20 wa tja: “Oviṋa ovingi mbya ndji rorwa na vyo tji twa ri moskole yokombanda, nai vi munika kutja kavinanḓengu. Tji me ripurire kotjiṋa hi, tji ndji pa ongamburiro yokutja omarorero ngu mbi muna nai, wina maye kapita. Nu eyuva rimwe me kamuna kutja mba toora omukambo omuwa okuyepirukira.”