OMAPURIRO OMITANDA NGU VE PURA
Omomuano uṋe mu me nakaura omeripura omavi?
Hapo ove omundu ngu vi?
Mbi ripurira koviṋa oviwa
“Mbi kondja okukara nondjoroka aruhe nokuhinokupindika. Mbi kondja okumeṱameṱa eyuva arihe.”—Valerie.
Mbi ripurira ku imbi ovivi
“Tji pa tjitwa otjiṋa otjiwa mbi hakahana okumuna kutja oruroto uriri, nu kauatjiri.”—Rebecca.
Mbi yakura oviṋa otja tji vi ri
“Okukara noumune ouwa aruhe ku tjita kutja u we momuinyo, indu oviṋa mbi wa ri amo undju tji vi ha yenenisirwe. Indu tji mo ripura noviṋa ovivi, ku tjita kutja u we momuinyo aruhe. Posi ya okuyakura oviṋa otja tji vi ri ku ndji vatera.”—Anna.
Hapo otjiṋa otjinanḓengu?
Ombeibela i tja: “Ingwi ngu nondjoroka, aruhe u nyanda omikandi.” (Omiano 15:15) Oukahu kutja ovandu mbe nakaura omeripura omavi nokuripurira ku imbi oviwa, popengi ve kara nondjoroka mehupo. Nu i rira oupupu ku wo okutjita omapanga omengi. Posi ya , kape novandu mbe vanga okukara pu novandu mbe noviyeruka.
Nandarire kutja ove omundu ngu ripurira koviṋa oviwa, ngunda pe noviṋa ovivi mbi tjitwa mehupo. Otjotjihorera:
Ozombuze popengi ze tjivisa ohunga novita novitjitwa vyoutwe.
Mape ya u kondja nomauzeu meṱunḓu.
Ngahino u kondja nomaungundipare woye omuini.
Epanga roye mape ya ari hungire poo ari tjiti otjiṋa tji mape ya atji ku hihamisa.
Moruveze rwokuhinokuyandja ombango komauzeu nga poo okuripurira ku wo tjinene, kara noumune ouwa. Okuyakura oviṋa otja tji vi ri maku ku vatere kutja o ha kara nomeripura omavi, nu o he riyandjere kutja ye ku wise momuinyo.
Tjimuna ovikamba ovizoozu vyombura tji vi zenga indu omutenya tji wa piti, omauzeu wetu wina otjinga ye zenga
Oviṋa mbi mo yenene okutjita
Tjiwa kutja povikando tjiva mape ya o tataiza.
Ombeibela i tja: “Kape nomundu omusemba kombanda yehi ngu tjita ouwa porwawo.” (Omuzuvarise 7:20) Okutjita ozondataiziro ku raisa kutja oove omundu ngwa kwatwa mouvi, nungwari kaove otjiporoporo.
Omuano mu mo yenene okuyakura oviṋa otja tji vi ri: Ungurira kozondataiziro zoye, posi ya o undjire ko kutja mape ya o ha tataiza rukwao. Omurumendu omutanda wena Caleb wa tja: “Ami mbi kondja okuhinokuyandja ombango tjinene kozondataiziro zandje kokutja e ha u momuinyo, posi ya mbi kondja okurihongera ko kokutja e ha yarukire po rukwao.”
O risasaneke kovandu varwe.
Ombeibela i tja: “Atu he rihivi, [atu he risasaneke na varwe, NWT] nu atu ha tasana eruru.” (Ovagalate 5:26) Indu tji mo tara koviperendero morungovi vyovitjitwa nu mbi u hi na wa ṋangwa, otjiṋa ho tji tjita kutja u we momuinyo. Ihi tji tjita kutja u ute okumuna kutja nangwari omapanga woye kaye ku vanga.
Omuano mu mo yenene okuyakura oviṋa otja tji vi ri: Ouatjiri owombwi wokutja kaaruhe tji mo ṋangwa kovitjitwa avihe. Nu oviperendero mbi mo munu korungovi kavi raisa ouatjiri auhe. Omutanda wena Alexis wa tja: “Otungovi twomahakaeneno tu raisa ovitjitwa imbi oviwa uriri mehupo rovandu. Ovandu popengi kave raisa oviṋa vyeyuva arihe kotungovi.”
Rira omundu ngu eta ohange nu tjinene meṱunḓu.
Ombeibela i tja: “Tji mape sorwa, kareye nohange.” (Ovaroma 12:18) Ove komoo yenene okurundurura omikambo vyovandu varwe, posi ya mo yenene okurundurura imbyo vyoye. Ove mo yenene okurira omundu ngu eta ohange.
Omuano mu mo yenene okuyakura oviṋa otja tji vi ri: Kondja kutja o ha eta omauzeu meṱunḓu roye. Posi ya, kara nohange ku neṱunḓu roye otja tjo tjo tjita komapanga woye. Omutanda wena Melinda wa tja: “Atuhe tu tjita ouvi. Nu povikando tjiva mape ya atu yatasana kouhinauke. Omerizirira wetu okutya kutja matu yenene okueta ohange poo indee.”
Kara nondangi.
Ombeibela i tja: ‘Opu mamu sokutjera okuhepa!’ (Ovakolose 3:15) Okukara nondangi ku tu vatera okuyandja ombango ku imbi oviwa mehupo retu moruveze rwokuyandja ombango ku imbi mbi he ri oviwa.
Omuano mu mo yenene okuyakura oviṋa otja tji vi ri: Tjiwa omauzeu woye, posi ya tara ku imbi mbi mavi kayenda nawa mehupo roye. Omukazendu omutanda wena Rebecca wa tja: “Eyuva arihe mbi tjanga otjiṋa otjiwa membo randje okurizemburukisa kutja pe noviṋa oviwa mbi tjitwa mehupo randje, nandarire kutja mbi nomauzeu.”
Tara kutja omapanga yeṋe ngu u na wo.
Ombeibela i tja: “Otjikaro tjovandu ovavi tji zunḓa omihingo omiwa.” (1 Ovakorinte 15:33) Indu tji u kara pu novandu ovayamburure vomapindi, ozongaro zawo ozombi nḓo maze ṱunu kove.
Omuano mu mo yenene okuyakura oviṋa otja tji vi ri: Indu omapanga woye tji ve nomauzeu omanene, mape ya ave pindike nu ave u momuinyo. Kondja otja pu mo yenene okuvevatera, posi ya o yandjere omauzeu wawo okukuṱuna tjinene. Omukazendu omutanda wena Michelle wa tja: “Katu sokukara tjinene pu novandu mbe noumune ouvi.”
Lesa ohunga noviṋa mbi mavi ku vatere okukara noumune ouwa
Eṱe tu hupa ‘motuveze otuzeu.’ (2 Timoteus 3:1) Hapo mo munu kutja ouzeu kove okukara noumune ouwa mouye wouzeu mbwi? Lesa orupa ndwi “Ongwaye tji tu muna omauzeu omengi nao?”
