Moruveze rwatjimanga Jehova ke nokuuhara ama raisa omuretima kouye mbwi. Ozongamburiro zoposyo maze nyonwa, oviwaṋa mavi rikutu pamwe okurwisa ovakarere va Mukuru, nu Jehova ma nyono ovarunde avehe movita vya Armagedon. Nondjoroka Ovakriste ve undja ovitjitwa ovinanḓengu mbyo.

Otjingaperi kutja katu nokutjiwa ondjivisiro aihe ohunga ondatumisire ondirise. Otjotjihorera, eṱe katu nokutjiwa kutja oyo mai utu ruṋe. Katu nokutjiwa kutja ozopolotika zouye maze ungurisa epu riṋe okuwira ozongamburiro. Katu nokutjiwa kutja omawiro woviwaṋa kovakarere va Mukuru maye kambura orure ndu ṱa pi, nu maye kamburire mo ye. Nu wina katu nokutjiwa kutja Jehova ma ungurisa ye okunyona ovanavita povita vya Armagedon.

Nungwari Omatjangwa ye tu pa ondjivisiro ndji matu hepa, kokutja tu yenene okuhungama oviṋa mbi mavi katjitwa moruyaveze nongamburiro nouvanḓe. Otjotjihorera, eṱe matu tjiwa kutja tu hupa komaandero ‘womayuva omasenina.’ (2Tim 3:1) Matu tjiwa kutja omawiro wozongamburiro maye ‘timburwa’ kokutja ongamburiro youatjiri ai ha nyonwa. (Mat 24:22) Matu tjiwa kutja Jehova ma yama ovakarere ve. (2Petr 2:9) Nu matu tjiwa kutja ingwi Jehova ngwa toorora okunyona ovarunde nokuyama otjimbumba otjinene mu Armagedon, omusemba nomunamasa.—Omavan 19:11, 15, 16.

Ovitjitwa vyomoruyaveze mbi mavi tjiti kutja ovandu ve “seurwe i omburuma.” Posi ya tji matu lese nokuripurira oukoto komuano Jehova ma yama ovakarere ve morukapitaveze, na imbi mbya vandurura ohunga noruyaveze mavi tu vatere kutja tu ‘kare kamuseka nokuyera oviuru vyetu, orondu onguturiro yetu tjinga aya tumbuka.’—Luk 21:26, 28.