Okuutira mombura ndji, matu kara noruveze oruingi rokurirongerisira Omazemburukiro wonḓiro ya Kristus. Indu Omariro Omayapuke tji maye wire meyuva romokati kotjivike, okutja ombongarero yEhupo retu rOukriste notjiungura tjetu tjokuzuvarisa kai nokukara ko otjivike ho. Indu tji maye wire mOroviungura poo Osondaha, okutja Ehungi nOmakonḓononeno wokambo kOruhungu kavi nokukara ko. Hapo mo ungurisa oruveze ndu wa wezirwa ndwi nawa? Tjimuna tji pa ri meserewondo etenga, ndino wina pe hepa okutjitwa ozondyero kotjitjitwa tjapeke hi. (Luk 22:7-13; km 3/15 1) Posi yokutja atuhe matu sokurongerisa omitima vyetu. Matu yenene vi okutjita nao?

• Ripurira kounanḓengu wokukara potjitjitwa hi.​—1Kor 11:23-26

• Kumba nu ripurira koupanga woye kuna Jehova.​—1Kor 11:27-29; 2Kor 13:5

• Lesa nu ripurira oukoto kOmatjangwa nge hungira ohunga nomaheero wOmariro Omayapuke.​—Joh 3:16; 15:13

Ovazuvarise tjiva ve lesa nokuripurira oukoto komalesero wOmbeibela wOmariro Omayapuke nge kara mokambo nga Examining the Scriptures Daily. Varwe ve lesa omatjangwa wOmbeibela nge ri mokaongo kehi mba. Nu varwe ve konḓonona otupa mokambo kOruhungu rukwao, tu tu kahurura Omariro Omayapuke norusuvero Jehova na Jesus ndu ve tu raisira. Kainatja kutja wa toorora viṋe, matu zeri kutja ngamwa omakonḓononeno ngu wa toorora maye ku tumbura popezu na Jehova nOmuna we.