Jesus wa yandja omuinyo we kovandu ovahahomonena. (Rom 5:8) Nu tjiri eṱe tu nondangi onene komuano Jesus mbwe tu raisira orusuvero mokuyandja omuinyo we mena retu. Nungwari, povikando tjiva eṱe tu zemba kutja Jesus wa ṱira ovakwetu wina. Nu hapo matu raisa vi orusuvero tjimuna o rwa Kristus komarumbi novaṱena kwetu ovahahomonena tjimuna eṱe? Tara komiano vitatu mbi. Otjitenga, ngatu kondje okukara nomapanga nge kurira mozongaro nḓa panguka ku inḓa ozetu nu tjiva voviwondo pekepeke. (Rom 15:7; 2Kor 6:12, 13) Otjitjavari, nga tu kare nongengezero kutja atu ha hungire poo okutjita oviṋa mbi mavi hihamisa ovakwetu. (Rom 14:13-15) Otjisenina, omukwetu tje tu tjiti navi, nga tu mu isire tjimanga. (Luk 17:3, 4; 23:34) Tji twa kondjo nomasa okuhorera Jesus momiano mbi, Jehova ma kayenda komurungu okusera ombongo ondaya mokutupa ohange nombwaneno.

TARERA OKAVIDIO NGA RIRA OMUWA TJINENE! NU U ZIRE OMAPURIRO NGA:

• Miki wa ri noumune uṋe ohunga nombongo ye pomautiro?

• Otjikwaye tji tja rundurura oumune we mbo?

• Otjihorera tja Jesus tja vatera vi Miki okukara noumune warwe rukwao? (Mar 14:38)

• Omiano 19:11 ma ri tu vatere vi okukara noumune ouwa ohunga nOvakriste ovakwetu?