ONGWAYE TJE RI OHEPERO: Ovandu mave sokurihonga ohunga nomirari vyaJehova nave tjiti omarundurukiro otja komirari mbyo kutja omerikotameneno wawo ye yakurwe i ye. (Jes 2:3, 4) Embo ndi Orusuvero rwaMukuru, oro ndi ri embo oritjavari ndi tu ungurisa momakonḓononeno wOmbeibela, ri vatera ovahongwa okutjiwa kutja omirari vyaMukuru vi ṱuna vi kehupo retu. (Hebr 5:14) Eṱe matu sokukondja okuṱuna komitima vya imba mbu tu honga kutja owo ve kare nonḓero yokutjita omarundurukiro.—Rom 6:17.

OMUANO WOKUTJITA NAO:

• Rirongerisa nawa, amo ripurire kovihepwa vyomuhongwa woye. Kara nomapuriro ngu mo kemupura ngu maye ku vatere okutjiwa kutja u ripura tjike nokutja u noumune uṋe ohunga noviṋa mbi me rihongo.—Omiano 20:5; be-E 259

• Ungurisa ouwongo mbu ri membo okuvatera omuhongwa woye okumuna onḓengu yokuṱakamisa omirari vyOmbeibela.

• Vatera omuhongwa woye okuripurira koviṋa mbi mavi ṱunu komeritjiviro we womomutima, posi yokutja o mu tjitire po ozondando.—Gal 6:5

• Nongengezero kondja okutjiwa kutja omuhongwa woye ma hepa ombatero yokuṱakamisa omirari tjiva vyOmbeibela poo indee. Nonḓero yatjiri mu tunduuza kutja ma tjite omarundurukiro ngu maye zikamene korusuvero rwe ku Jehova.—Omiano 27:11; Joh 14:31