ONGWAYE TJE RI OHEPERO: Ovatwirisiwa nozonḓu zarwe ve ṋanga ovandu vomihoko avihe okuyekukambura “omeva womuinyo.” (Omavan 22:17) Omasasanekero womeva nga, yekuramena po oviṋa avihe Jehova mbye tu pa okuyama navyo ovandu mbe nonḓuviro ku ye kouvi nonḓiro. Kokutja tu vatere ovandu mbe nozombazu nozongamburiro pekepeke, matu sokuzuvarisa ‘ombuze ombwa yaaruhe’ momuano mbu mau nana ombango yomundu auhe kourike we.​—Omavan 14:6.

OMUANO WOKUTJITA NAO:

• Toorora epu netjangwa ndi mari yenene okuṱuna komitima vyovandu momaturiro mu u zuvarisira. Ove mo yenene okutoorora otjihorera tjokuzuvarisa poo okuhungirira kepu ndi wa ungurisa rukuru, nu ndaari nana ombango yovandu tjinene. Hapo omapu nomatjangwa yeṋe nge nana ombango yovandu momaturiro weṋu? Nu ombuze iṋe ovandu ovengi ndji mave hungirire ko tjinene? Otjikeṋa tji matji yenene okunana ombango yomurumendu poo omukazendu?

• Korisa ovandu omuano mu ve korisiwa otja kombazu yawo, momaturiro woye.​—2Kor 6:3, 4

• Tjiwa omambo nozovidio ngu tu nawo mOviungurisiwa vyetu vyokuhonga, nu u yandje nokuraisa komundu ngu ma raisa ombango

• Nana ondjivisiro morungovi, ndji ri momaraka wovandu mbu mape ya amu hakaenene motjiungura tjokuzuvarisa momaturiro woye

• Rundurura epu roye kokutja ri hitasane novihepwa vyomunionganda. (1Kor 9:19-23) Otjotjihorera, ove otjo tja vi, indu omunionganda tje ku raere kutja eye wa zepaisa omusuverwa we?

TARERA OKAVIDO, NU U ZIRE OMAPURIRO NGU MA YE KONGORERE MBA:

• Omuzuvarisa wa utu nepu riṋe ku nomunionganda?

• Hapo omunionganda wa ri mongaro iṋe?

• Etjangwa riṋe ndi ra hitasana nawa nongaro ndji, nu omena ratjike?

• Omomuano uṋe mu mo yenene okurundurura ehungi roye, kokutja ri nane ombango yovandu momaturiro mu u zuvarisira?