Ongwaye tji tu kara nondjoroka onene pomaworonganeno wotukondwa? Tjimuna mu Israel otjikuru omaworonganeno moruveze rwetu, ye tu pa oruveze rokuyozika Jehova pu novakambure ovakwetu omayovi omengi. Tu tjaterwa okuzuva ondjivisiro ndji tu vatera okukara popezu na Jehova. Nu wina tu tjaterwa okukara pu nomapanga novazamumwe vetu. Ondangi yetu ondji tu hinga okukara pomaworonganeno womayuva yetatu nga.

Tji twa worongana pamwe, katu sokuripura kouwa mbu matu munu kourike wetu uriri, posiya ngatu ripurire komiano mbi matu raisa orusuvero ku varwe. (Gal 6:10; Hebr 10:24, 25) Indu tji matu paturire varwe omuvero poo tji matu ṱiza ovihavero vya imba mbu tu ri pamwe uriri, matu raisa kutja tu ripurira kozonḓero za varwe. (Fil 2:3, 4) Omaworonganeno wotukondwa oruveze oruwa kweṱe okutjita oupanga. Komurungu na kombunda yoprograma noruveze rwometaha, matu yenene okuungurisa oruveze ndwi okuhungira ku nomundu ngu tu hina okutjiwa. (2Kor 6:13) Oupanga mbu mwa tjiti mbwi mau yenene okukarerera! Nu kombanda ya avihe, ovandu varwe tji ma ve munu orusuvero ndu matu raisa owo mave yenene okurikuta kuna eṱe mokukarera Jehova.—Joh 13:35.

TARERA OKAVIDIO NGA OMAWORONGANENO WOUYE AUHE WEPU NDI “ORUSUVERO KAMAARU YANDA KO”, NU OKUZAMBO ZIRA OMAPURIRO NGA:

• Omomuano uṋe orusuvero mu rwa raisiwa kovakambure ovakwetu mba ṋangwa pomaworonganeno wouye auhe wombura ndji 2019?

• Ongwaye ombwaneno norusuvero mokati kovakarere va Jehova tje ri otjiṋa otjihimise?

• Ovikaṋena viṋe vyorusuvero rwOukriste mbya tamunwa i ouṋepo wOrutu Orunane?

• Omomuano uṋe orusuvero mu rwawaneka ovakambure ovakwetu?

• Hapo matu sokukara nondando iṋe?