Mu Septemba, matu tjiti ozongondjero zokuningira ovandu okurihonga Ombeibela ku na eṱe, mokuungurisa okambo nga Yorokera ehupo nga aruhe. Ovazuvarise mave yenene okurira ovakandjira ovavatere, nu mave undjirwa ko okuungura ozoiri 30. Hapo matu kayendisa vi omazuvarisiro wapeke nga?

• Otjikando otjitenga: Raisira omundu omukuma wokongotwe wokambo nga Yorokera ehupo nga aruhe, okunana ombango ye. Okuzambo mu raisira kutja omakonḓononeno wOmbeibela ye kayendisiwa vi. Zemburuka ovandu mba raisa onḓero rukuru, tjimuna imba mbu u kavarura rukwao. Nandarire kutja rukuru kaave vanga okurihonga Ombeibela, owo nai mape ya ave kara nonḓero mokambo poo momuano omupe mu tu kayendisa omakonḓononeno wetu wOmbeibela. Okambo nga kake sokuisiwa pozonganda pu pe hi novandu, poo motutuu tu matu i kovandu mbe hi na va raisire onḓero yokurihonga Ombeibela rukuru. Okomiti yOviungura vyOmbongo, mai woronganisa ozombongarero zokupita motjiungura tjokuzuvarisa momueze mbwo.

• Opotuveze twarwe: Indu ombongo yeṋu tji ungurisa okatemba komambo, eṋe mamu yenene okutwa mo okambo nga Yorokera ehupo nga aruhe. Raera imba mba raisa onḓero kutja okambo ngo ke ya pu nomakonḓononeno wOmbeibela wotjari. Ove mo yenene okuveraisira kutja omakonḓononeno wOmbeibela ye kayendisiwa vi oiri ndjo poo kombunda. Omutarere woviungura vyokuzuvarisa, ma toorora ovazuvarise mbu mave i kozongetjefa nokukaningira ovandu okuuta okurihonga Ombeibela. Ove wina mo yenene okuningira ovandu mbu mu ungura pamwe okurihonga Ombeibela ku na ove, poo ovandu mbu mamu hakaene ngunda au he ri motjiungura tjokuzuvarisa.

Jesus we tu rakiza kutja ngatu ‘kaisa po ovandu ovahongewa nokukevehonga.’ (Mat 28:19, 20) Omazuvarisiro wapeke nga, ngaye tu vatere okuyenenisa ondando ndji, mokuungurisa okambo nga Yorokera ehupo nga aruhe.