Tu ungurisa omasa wetu nawa indu tji tu nozondando zokuungura ovingi motjiungura tja Jehova. (1Kor 9:26) Okukara nozondando motjira tja Jehova, ku tu vatera okuungurisa oruveze ndu ri po ngunda omaandero aye hi ye ya. (Ef 5:15, 16) Pomerikotameneno weṱunḓu hungirireye kozondando nḓu mu na zo kombura ombe yoviungura vyetu. Okambo komakonḓononeno nga, make ku vatere nozondando nḓu mo yenene okuritwapera, nokukumbira ko ngunda au hi ya toora omukambo.—Jak 1:5.

Otjotjihorera, eṱunḓu mari yenene okuvaterasana kokutja omundu umwe meṱunḓu, ma yenene okurira omukandjira omukarerere. Tji mo munu kutja ma rire ouzeu kove okuyenenisa ozoiri nḓe undjirwa ko, hungira ku novakandjira varwe mbe ri mongaro tjimuna oyoye. (Omiano 15:22) Ngahino mamu yenene okupura omukandjira omapuriro pomerikotameneno weṋu weṱunḓu. Okuzambo tjanga ongongorasaneno ndji mai ku vatere okuyenenisa ozoiri zoye zoukandjira. Indu tji wa ri omukandjira rukuru, tara kutja ongaro yoye mai ku yandjere okuvatera otjomukandjira omukarerere rukwao.

Hapo tjiva meṱunḓu roye mave yenene okukarera otjovakandjira ovavatere oure womueze umwe poo kombanda yanao? Tji u hi nokuyenena okuungura ovingi mena rotjiṋa kaaṋi, mo yenene okukarera otjomukandjira omuvatere, nu o ungura ozoiri ozonḓiṱi uriri meyuva. Indu tji u ha munu oruveze okupita motjiungura tjokuzuvarisa mokati kotjivike, mena roviungura poo okuyenda koskole, ngahino mo yenene okutoorora omueze mbu nomayuva womasuviro poo ozonavyeka ndano. Kokalenda, tjangeye kutja mwa toorora kutja mamu rire ruṋe ovakandjira ovavatere, nu tjangeye kutja mamu yenene vi okutjita nao.—Omiano 21:5.

TARERA OKAVIDIO NGA RIRA OMUKANDJIRA OMBANḒE, NU OKUZAMBO U ZIRE OMAPURIRO NGA:

• Otjihorera tja Aamand tje tu hongo tjike, ohunga norusuvero oruṱakame Jehova ndwe raisa ku imba mbe tjita ozongondjero zokukarera otjovakandjira?