ONGWAYE TJE RI OHEPERO?: Embo rOvakorinte ovatenga ra zikama motutuu 14 omuapostele Paulus twa tjanga kovakambure ovakwao okuvetunduuza. Omundu tji ma tjanga orutuu u kara noruveze okutoorora omambo we nongengezero, nu ingwi ngwa yakura orutuu u yenena okurulesa rukwao. Okutjanga otutuu, omuano omuwa wokuzuvarisa ombuze ombwa kovazamumwe na kovatjiwasane. Nu wina omuano omuwa wokuzuvarisira imba mbu tu ha yenene okuhakaena. Otjotjihorera, mape ya omundu a raisa onḓero mombuze yOmbeibela, posiya aku rire ouzeu okuhakaena kuna ye rukwao. Mape ya aku rire ouzeu okuhakaena kuna tjiva momaturiro mu tu zuvarisa, mena rokutja va tura mozondjuwo nḓe ha yenene okuhitwa oupupu, nḓe ha yandjere ovandu okuhita, poo nḓe ri kokure. Ovikeṋa tjiva mbi matu sokuyandja ko ombango, nu tjinene tji matu tjanga otutuu kovandu mbu tu hei?

OMUANO WOKUTJITA NAO:

• Tjanga oviṋa mbyotjo hungira komundu omuini. Pomautiro worutuu rwoye, ritjiukisa nawa nu tamuna oukahu kutja ongwaye tji mo mu tjangere orutuu. Ngahino pura epuriro omundu ndi me ripurire ko, okuzambo u mu raere kutja nga yende korungovi rwetu. Okuzambo mu raera ohunga nomahongero wOmbeibela nge yandjwa morungovi, omahongero wetu wOmbeibela ngu tu yandja kovandu pozoyawo, okuzambo tamuna omapu tjiva okuza mokambo ngamwa akehe ku tu ungurisa momakonḓononeno ngo. Mo yenene okutwa mo oviṋa tjimuna okakarata komahakaeneno, okambapira komaṋangero, poo okambapira ngamwa akehe morutuu rwoye.

• O hungire oviṋa ovingi. Tjita kutja orutuu rwoye aru ha rire orure tjinene, tjarwe omundu ku mo hindi mape ya a urwa okurulesa.—Tara kotjihorera tjorutuu

• Lesa nawa rukwao okutara kutja omambo morutuu rwoye wa tjanga nawa, wa tjanga ouhirona, maru raisa ombepo ombwa, nu maru pose nawa poo indee. Twako ouposiela mbwa yenene kokayaṱu korutuu