Oviṋa mbi tu yenena okumuna vi vatera okuṱiza ombango yomundu, nu vi mu vatera okuzuva nawa nokuzemburuka oviṋa mbye rihongo. Omuute wetu Omunenenene, Jehova wa ungurisa oviṋa mbi tu yenena okumuna, okuhonga ovakarere ve omapu omananḓengu. (Gen 15:5; Jer 18:1-6) Jesus, Omuhonge wetu Omunene wina aa ungurisa oviṋa mbi tu yenena okumuna. (Mat 18:2-6; 22:19-21) Otjiṋa tjimwe tji tu yenena okumuna tji tja vatera ovandu tjinene mozombura nḓa kapita, ozovidio. Ove hapo u ungurisa ouvidio tji mo hongo ovahongwa voye?

Pa rongerisiwa ozovidio 10 okuvatera okuhonga ehongwa arihe mokambo nga Ombuze ombwa okuza ku Mukuru! Epu arihe rovidio potuingi ri hitasana ku nepuriro rimwe mokambo nga, nda tjangwa outindi. Okambo nga Ombuze ombwa ku ke ri mo jw.org, ke nolinka ndji tu zemburukisa kutja oruṋe tji matu sokuraisa okavidio akehe. Nu wina pe nozovidio zarwe, nḓe tu pa ondjivisiro oweziwa ku indji ndji ri momambo nge ungurisiwa komakonḓononeno, nge ri moviungurisiwa vyetu vyokuzuvarisa.

Mo hungirire kepu rOmbeibela ndi ri ezeu komuhongwa okuzuva nawa? Poo omuhongwa woye u ri kehi yomarorero kaaṋi? Paha ozovidio mo-jw.org® na mo-JW Broadcasting® u tare kutja ovidio iṋe ndji mai yenene okumuvatera. Ove nomuhongwa woye mamu yenene okutara ovidio imwe pamwe okuzambo amu hungirire ko.

Omueze auhe pe pitisiwa ozovidio ozombe. Otja tji mo tarere ovidio aihe, ripura kutja mo yenene okuzeungurisa vi okuhonga varwe.