David wa zepa Goliat mena rokutja wa ṱaṱera ku Jehova. (1Sam 17:45) Jehova u vanga okuraisa omasa we mokuvatera ovakarere ve avehe. (2Ekuruh 16:9) Matu yenene vi okuriyameka komasa wa Jehova moruveze rwokuriyameka komasa wetu oveni? Omiano vitatu mbi mavi tu vatere okuṱaṱera komasa wa Jehova:

• Kumba aruhe. O ningire ondjesiro uriri tji wa zu nokutjita ouvi, posi ya wina ningira omasa wokutuurunga omarorero. (Mat 6:12, 13) Ngunda au hi ya toora omikambo ningira ounongo ku Jehova, moruveze rokumuningira kutja nga sere omikambo vyoye mbi wa toora rukuru ondaya.—Jak 1:5

• Lesa nokukonḓonona Ombeibela aruhe. Lesa Ombeibela yoye eyuva arihe. (Eps 1:2) Ripurira ko oukoto kovihorera vyovandu mbe ri mOmbeibela u ṱakamise ovihorera vyawo oviwa mehupo roye. (Jak 1:23-25) Rirongerisa kotjiungura tjokuzuvarisa komurungu woruveze, pendje nokuṱaṱera kondjiviro ndji u na yo rukuru. Mo sokurirongerisa kozombongarero zombongo kokutja u kamune ouwa ku zo.

• Ungura pamwe notjira tja Jehova. Tjiwa omirari omipe okuza kotjira tja Jehova nu u hakahane okuviṱakamisa. (Num 9:17) Puratena kovanene vombongo indu tji mave ku pe omaronga nomirari.—Hebr 13:17

TARERA OKAVIDIO NGA KAMU NOKUHEPA OKUTIRA ONDATUMISIRE. OKUZAMBO U ZIRE OMAPURIRO NGA:

• Hapo ovakambure ovakwetu aave tira tjike?

• Ovikeṋa mbye ve vatera okutuurunga ondira ndji va ri na yo?