Ovahongwa vOmbeibela mave sokukara nongamburiro yomasa kokutja ve tjate ku Mukuru. (Hebr 11:6) Mo yenene okuungurisa embo ndi Yorokera ehupo nga aruhe okuṱuna komitima vyawo. Embo rwomakonḓononeno ndi mu nomatjangwa, omakahururiro omakahu, omapuriro nozovidio nḓu maze yenene okuvetunduuza, noviperendero oviwa. Okuvatera ovahongwa vetu vOmbeibela okukara novikaṋena vyOukriste nokukara noupanga ouwa ku na Mukuru, tu ve vatera okutunga ongamburiro yomasa ndji hi nokusesetwa i yomuriro.—1Kor 3:12-15.

Ovandu tjiva ve muna ouzeu okutunga oupanga ku na Mukuru ngu ha munika, ku nao eṱe matu sokuvevatera okutjiwa Jehova nokukara nongamburiro mu ye.

TARERA OKAVIDIO NGA KURISA ONGAMBURIRO MU JEHOVA MOKUUNGURISA EMBO NDI “YOROKERA EHUPO NGA ARUHE.” OKUZAMBO U ZIRE OMAPURIRO NGA:

• Eṱe matu tjiwa vi kutja omukazendu omukambure we rirongerisa nawa komakonḓononeno wOmbeibela?

• Eye wa pura vi omapuriro nongengezero okutjiwa oumune womuhongwa we ohunga na Jesaja 41:10, 13?

• Okavidio nezeva rOmbeibela vya ṱuna vi komuhongwa?

Ovandu ovengi kave zuu nawa otjisuta tjonguturiro nu kave munu kutja otjiyandjewa tja Mukuru tja yandja ku wo. (Gal 2:20) Ku nao eṱe matu sokuvevatera okutunga ongamburiro motjisuta tjombunguhiro ya Jesus.

TARERA OKAVIDIO NGA KURISA ONGAMBURIRO MU JESUS MOKUUNGURISA EMBO NDI “YOROKERA EHUPO NGA ARUHE.” OKUZAMBO U ZIRE OMAPURIRO NGA:

• Eṱe matu tjiwa vi kutja omurumendu omukambure we rirongerisa nawa komakonḓononeno wOmbeibela?

• Omomuano uṋe ma ungurisa orupa ndwi “Rihonga ovingi” okuvatera omuhongwa we?

• Ongwaye ongumbiro tji i ri otjiṋa otjinanḓengu komuhongwa?